സ്റ്റാർട്ടപ്, യൂണിറ്റി മാൾ കേരളത്തിന് ഉപകരിക്കും

കേന്ദ്രബജറ്റ് കേരളത്തിന് എങ്ങനെ പ്രയോജനപ്പെടുത്താം- അന്വേഷണം

- ഡോ.പി. ഇന്ദിരാദേവി

രാജ്യത്തെ ആഭ്യന്തര വരുമാനത്തിന്റെ 15 ശതമാനം മാത്രമാണ് കൃഷിയുടെ സംഭാവന. എങ്കിലും മുഖ്യ തൊഴിൽ മേഖലയെന്ന നിലയിൽ കാർഷികമേഖലയുടെ സ്ഥാനം ഇന്നും മുൻനിരയിൽ തന്നെ. പക്ഷേ, ഇത്തവണ കേന്ദ്രബജറ്റിൽ കാർഷികമേഖല പദ്ധതി വിഹിതം 5 ശതമാനത്തോളമായി പരിമിതപ്പെടുത്തിയിരിക്കുന്നു. പിഎം കിസാൻ, ഫസൽ ഭീമ യോജന, വിപണി ഇടപെടൽ, കാർഷിക വിദ്യാഭ്യാസം, ഗവേഷ ണം, രാസവള സബ്സിഡി എന്നിവയ്ക്കുള്ള വിഹിതം ഗണ്യമായി കുറച്ചു. ഇതൊക്കെയാണെങ്കിലും ഈ ബജറ്റിൽ കേരളത്തിന് അനുകൂലമാക്കാവുന്ന പുത്തൻ പദ്ധതികൾ പലതുമുണ്ട്.

മൂലധനനിക്ഷേപം കൃഷിയിലും

മൂലധനനിക്ഷേപത്തിന് വലിയ പ്രാധാന്യം നൽകി 10 ലക്ഷം കോടി രൂപയാണ് വകയിരുത്തിയിട്ടുള്ളത്. ഈ വിഹിതത്തിൽ കാർഷിക മൂലധന നിക്ഷേപവും ഉൾപ്പെടും. കുറച്ചു കാലമായി കാർഷികരംഗ ത്തെ പൊതുമേഖലാനിക്ഷേപം കുറഞ്ഞുവരികയായിരുന്നു. പൊതു മേഖലാനിക്ഷേപം, സ്വകാര്യ മൂലധന നിക്ഷേപത്തിനു പ്രേരകമാകുമെന്നതിനാൽ ഈ തീരുമാനം സ്വാഗതാർഹമാണ്. ഉൽപാദനാനന്തര രംഗത്തും (സംസ്കരണം സൂക്ഷിച്ചു സംവിധാനങ്ങൾ, ചരക്കുനീക്ക വിപണി)ഉല്പാദനരംഗത്തും (മണ്ണ്-ജലസംരക്ഷണം, യന്ത്രവൽക്കരണം) മൂലധന നിക്ഷേപ പദ്ധതികൾ ആവിഷ്കരിച്ചു നടപ്പാക്കാനുള്ള ഈ സാധ്യത കേരളം പ്രയോജനപ്പെടുത്തണം.