പൂവേണം ...പൂവടവേണം

തെക്കും വടക്കും നടുക്കുമായി ശയിക്കുന്ന കേരളഭൂമിശാസ്ത്രം ഏറെ വ്യത്യസ്തം. ഓണം ഒന്നേ ഉള്ളൂ എങ്കിലും ദിക്കും ദിശയും മാറുന്നതോടെ ആഘോഷങ്ങളും ആചാരങ്ങളും മാറുന്നു.

- എസ്.പി.ജെ

കേരളത്തിലെ ഓണം ഒരുപോലെ എന്ന് തോന്നുന്നത് പുറത്തു നിന്ന് നോക്കുന്നവർക്ക് മാത്രമാണ്. അകത്തു നിന്ന് സൂക്ഷിച്ചുനോക്കിയാൽ കാണാം തെക്ക് അനന്തപുരി മുതൽ നടുക്ക് എറണാകുളം വഴി കാസർകോട് എത്തുമ്പോൾ ആചാരങ്ങളും ആഘോഷങ്ങളും മാത്രമല്ല സദ്യവട്ടങ്ങൾ വരെ അടിമുടി മാറിയിരിക്കുമത്രേ. തൂശനിലയിൽ ചിക്കൻ വിളമ്പിയാൽ തെക്കൻ ദേശക്കാരുടെ കൺപുരികങ്ങൾ കൂട്ടിമുട്ടും. ചിക്കനോ, ബീഫോ ഇല്ലാത്ത ഓണസദ്യ കണ്ണൂർക്കാർക്ക് ചിന്തിക്കാനുമാകില്ല. എന്തിനേറെ പറയുന്നു ദേശങ്ങൾ മാറുന്നതോടെ ഓണപ്രാതലിലും വ്യത്യാസം രുചിക്കാം.

മഹാബലിയെ തൃക്കാക്കരയപ്പനും, ഓണത്തപ്പനുമായി സങ്കൽപ്പിക്കുന്ന മദ്ധ്യകേരളത്തിലും, വടക്കൻ ദേശങ്ങളിലും തിരുവോണപ്പുലരിയിൽ "ഓണം കൊള്ളൽ' ചടങ്ങ് നടക്കണമെങ്കിൽ “പൂവട നിർബന്ധം. ഓണപ്രാതലിനുള്ള വിഭവവും അന്നേദിനം പൂവടയാണ്. തിരുവോണപ്പുലരിയിൽ തിരുവനന്തപുരവും, കൊല്ലവും, പത്തനം തിട്ടയും ഇഡ്ഡലിയിലും സാമ്പാറിലും മുങ്ങുമെന്ന് കേട്ടാൽ തൃക്കാക്കരയപ്പന്റെ പ്രജകൾ കിടുകിടാ എന്ന് ഞെട്ടും...