കള്ളനും ന്യായാധിപനും

വഴിവിളക്കുകൾ

-  പി.എൻ. വിജയകുമാർ

എഴുത്തിന്റെയോ വായനയുടെയോ പാരമ്പര്യം എനിക്കില്ല. ചെറുവള്ളി എസ്റ്റേറ്റിലായിരുന്നു ബാല്യം. എസ്റ്റേറ്റ് തൊഴിലാളികൾ താമസിക്കുന്ന കെട്ടിടത്തിലെ ഒറ്റമുറിയായിരുന്നു വീട്. അച്ഛൻ ഫാക്ടറിയിലെ മെക്കാനിക്കും. അമ്മ തോട്ടംതൊഴിലാളിയുമായിരുന്നു. നാലിലും അഞ്ചിലും പഠിക്കുമ്പോൾ തൊഴിലാളികൾക്കു വേണ്ടി മാനേജർക്ക് സമർപ്പിക്കാനുള്ള അവധിയപേക്ഷ എഴുതിക്കൊടുത്തിരുന്നത് ഞാനായിരുന്നു. അക്ഷരത്തെറ്റുകളോടെ എഴുതിയ ആ അവധിയപേക്ഷകളാണ് എന്റെ എഴുത്തിന്റെ തുടക്കം.

പതിനെട്ടു കിലോമീറ്റർ അകലെയുള്ള മക്കപ്പുഴ എൻഎസ്എസ് ഹൈസ്കൂളിൽ പഠിക്കുമ്പോൾ സഹപാഠി ഗോപാലനൊപ്പമാണ് സ്കൂളിൽ പോയിരുന്നത്. കുട്ടിവനത്തിലൂടെയുള്ള യാത്ര ഭയപ്പെടുത്തുന്നതായിരുന്നു. ആ ഗോപാലൻ ഇന്നും പ്രിയസുഹൃത്താണ്.