അറിവിന്റെ വെട്ടം, നന്മയുടേതും

വഴിവിളക്കുകൾ

- ഡോ. പി.വി. കൃഷ്ണൻ നായർ

സാഹിത്യ നിരൂപകൻ, വിവർത്തകൻ എന്നീ നിലകളിൽ പ്രശസ്തൻ. തൃശൂർ കേരളവർമ കോളജ്, കാലടി ശ്രീശങ്കര സംസ്കൃത സർവകലാശാല എന്നിവിടങ്ങളിൽ അധ്യാപകനായിരുന്നു. കേരള സാഹിത്യ അക്കാദമി, കേരള സംഗീത നാടക അക്കാദമി എന്നിവയുടെ സെക്രട്ടറിയായിരുന്നു. കേന്ദ്ര സാഹിത്യ അക്കാദമി മലയാളം ഉപദേശകസമിതി അംഗം, സമസ്ത കേരള സാഹിത്യ പരിഷത്ത് നിർവാഹക സമിതി അംഗം. വൈലോപ്പിള്ളി സ്മാരക സമിതി പ്രസിഡന്റായും പ്രവർത്തിച്ചു വരുന്നു.

ഭാര്യ: പ്രഫ. സി, ഇന്ദിര, മക്കൾ: സുധിഭൂഷൺ, സുജിത് കിഷൻ, വിലാസം: ‘ബോധി’, വിദ്യാനഗർ, അയ്യന്തോൾ, തൃശൂർ - 680 003

കാസർകോടിലെ പെരിയ വേങ്ങയിൽ വീട്ടിൽ എട്ടുമക്കളിൽ മൂന്നാമനായി എന്റെ ജനനം. ശ്വസിച്ചത് സ്വാതന്ത്ര്യസമരത്തിന്റെ ഉദാത്തമൂല്യങ്ങളാണ്. ദേശസ്നേഹിയും കോൺഗ്രസുകാരനുമായിരുന്ന അച്ഛൻ, നന്മയുടെ പ്രതീകമായ അമ്മ, സ്നേഹവാത്സല്യങ്ങൾ കൊണ്ട് സാന്ദ്രമായ കുടുംബാ ന്തരീക്ഷം. ഗാന്ധിജിയും നെഹ്റുവുമായിരുന്നു വീട്ടിലെ മാർഗദീപങ്ങൾ. തികഞ്ഞ ഈശ്വരവിശ്വാസമായിരുന്നു ജീവിതത്തിന്റെ പ്രചോദനകേന്ദ്രം.