സെറെൻഡിപിറ്റി (കാലിൽ ചുറ്റിയ തേടാത്ത വള്ളികൾ)

വായനശാല 

- പ്രൊഫ. സി. രവീന്ദ്രനാഥ്

അടുക്കളയിലുണ്ടായ ഒരു ചെറുസ്ഫോടനം ഒരു കണ്ടുപിടുത്തത്തിലേക്ക് നയിച്ച കഥ പറയാം. സ്വിസ്-ജർമൻ രസതന്ത്രജ്ഞൻ ഫ്രെഡറിക് ഷോൺബീനാണ് കഥയിലെ നായകൻ. അദ്ദേഹത്തിന്റെ പരീക്ഷണങ്ങൾ പലതും അടുക്കളയിലാണ് നടത്തിയിരുന്നത്. ഷോൺബീന്റെ പത്നിക്ക് ഈ അടുക്കള പരീക്ഷണങ്ങൾ ഒട്ടും ഇഷ്ടമായിരുന്നില്ല.

1845 ൽ ഭാര്യ വീട്ടിലില്ലാതിരുന്ന സമയത്ത് ഷോൺബീൻ ഒരു പരീക്ഷണം നടത്താനായി അടുക്കളയിലെത്തി. തിരക്കിട്ട് കാര്യങ്ങൾ ചെയ്യുന്നതിനിടയിൽ ഒരു ബീക്കറിൽ സൂക്ഷിച്ചിരുന്ന നൈട്രിക് ആസിഡ് - സൾഫ്യൂരിക് ആസിഡ് മിശ്രിതം കൈതട്ടി നിലത്തുവീണ് ഒഴുകിപ്പരന്നു. ഭാര്യ തിരിച്ചുവരുന്നതിന് മുമ്പ് അവിടം വൃത്തി യാക്കാനായി കൈയിൽ കിട്ടിയ തുണിയെടുത്ത് നിലത്ത് വീണ ആസിഡ് തുടച്ചു. തുടച്ചതിന് ശേഷമാണ് ആ തുണി ഭാര്യയുടെ മേൽവസ്ത്രമാണെന്ന് മനസ്സിലായത്. എളുപ്പത്തിൽ ഉണക്കിയെടുക്കാനായി സ്റ്റൗവിന്റെ മുകളിൽ അയ കെട്ടി തൂക്കിയിട്ടു. തൂക്കിയിട്ടതും ഒരു ചെറു സ്ഫോടനത്തോടെ വസ്ത്രത്തിന് തീ പിടിച്ചു. സാധാരണ ഗതിയിൽ കൂടുതൽ പരിഭ്രമം തോന്നുന്ന സന്ദർഭം.