യുണീക് മെഷീൻ

ട്വിൻ സിലിണ്ടർ എൻജിൻ കരുത്തുമായി വേഴ്സിസ് എക്സ് 300ന്റെ രണ്ടാം വരവ്

- നോബിൾ

അഡ്വഞ്ചർ ടൂറർ വിഭാഗത്തിൽ ഒരിടവേളയ്ക്കുശേഷം തിരിച്ചെത്തിയിരിക്കുകയാണ് കാവാസാക്കിയുടെ വേഴ്സിസ് എക്സ് 300. 2006ൽ രാജ്യാന്തര വിപണിയിലെത്തിയ വേഴ്സിസ് 300 2017ൽ ആണ് ഇന്ത്യയിൽ ടയർ തൊടുന്നത്. കംപ്ലീറ്റ് ബിൽറ്റ് യൂണിറ്റായാണ് (സിബിയു) അന്നു വിപണിയിലെത്തിയത്. 2019ൽ വിപണിയിൽ നിന്നു പിൻവാ ങ്ങി. ആറു വർഷത്തിനു ശേഷം തിരിച്ചെത്തുമ്പോൾ വേഴ്സിസിൽ എന്തൊക്കെ മാറ്റങ്ങളാണ് കാവാസാക്കി വരുത്തിയതെന്ന് നോക്കാം.

ഡിസൈൻ

ഭാരം കുറഞ്ഞ ടൂറിങ് ബൈക്കുകളിൽ മുൻനിരയിൽ നിർത്താം കാവാസാക്കിയുടെ വേഴ്സിസ് എക്സ് 300നെ. സിറ്റി കമ്യൂട്ടിങ്ങിനും ടൂറിങ്ങിനും ചെറിയ ഓഫ്റോഡിങ്ങിനുമെല്ലാം ഇണങ്ങും വിധമാണ് രൂപകൽപന. പുതുതല മുറ ബൈക്കുകളെപ്പോലെ ആടയാഭരണങ്ങളുടെ ധാരാളിത്തമില്ല. ഒതുക്കമുള്ള അത്ലീറ്റ് ബോഡി. ഉയരമുള്ള വീതികുറഞ്ഞ എടുത്തു നിൽക്കുന്ന വടിവൊത്ത രൂപം. ഷാർപ് ലൈനുകളും കട്ടുകളും നിറഞ്ഞ ബോഡി പാനലുകൾ. ഉയരമുള്ള സ്പോർട്ടിയായ മസിൽ വൈസറും തുടിപ്പുള്ള ടാങ് പാനലും ഒതുങ്ങിയ സൈഡ് ഫെൻഡൽ പാനലും ഉയരമു ള്ള ടെയിൽ സെക്ഷനും ഏതൊരു അഡ്വഞ്ചർ ബൈക്ക് പ്രേമിയെയും ഹരം പിടിപ്പിക്കും. ഫോട്ടോ ഷൂട്ടിനിടയിൽ കാണാനായി അടുത്തുവന്ന നാൽപതുകഴിഞ്ഞ യുവാക്കളുടെ മട്ടും ഭാവവും ചോദ്യവുമെല്ലാം അതിനെ ശരിവയ്ക്കുന്നതായിരുന്നു. മാത്രമല്ല, "ക്ലാസ് ഡിസൈനാ... അലുകുലുത്തുകൾ ഒന്നും ഇല്ല, കൊള്ളാം എന്നൊരു കമന്റും.

മൊത്തത്തിൽ നോക്കിയാൽ നിർമാണ നിലവാരം മികച്ചത്. സ്വിച്ചുകളും ഹാൻഡിൽ ബാർ എൻഡ് വെയ്റ്റുമൊക്കെ നോക്കിയാൽ അതു മനസ്സിലാകും. പെയിന്റ് ക്വാളിറ്റിയും സൂപ്പർ.