ഈ ലോകം ആർ കാണുന്ന സ്വപ്നമാണ്

നൻപകൽ നേരത്ത് മയക്കം സിനിമയുടെ ലൊക്കേഷനിലൂടെ എഴുത്തുകാരനും തിരക്കഥാകൃത്തുമായ എസ്. ഹരീഷ്

- എസ്. ഹരീഷ്

എനിക്കിഷ്ടപ്പെട്ട സിനിമകളിൽ മിക്കതിലും സ്ഥലം ഒരു പ്രധാന കഥാപാത്രമായി വരാറുണ്ട്. നോവലുകളിലും അങ്ങനെയാണ്. താഴ്വാരം എന്ന സിനിമ ആലോ ചിച്ചുനോക്കുക. അട്ടപ്പാടിയുടെ നിഗൂഢത തോന്നിക്കുന്ന ദൃശ്യഭംഗി ഒഴിവാക്കി അതിനെക്കുറിച്ച് ആലോചിക്കാനേ പറ്റില്ല. നോവലുകളുടെ കാര്യമെടുത്താൽ കയറും ഖസാക്കിന്റെ ഇതിഹാസവും എത്രമാത്രം കഥ പറയുന്ന സ്ഥലങ്ങളുമായി ബന്ധപ്പെട്ടിരിക്കുന്നു. അവസാനമായി കണ്ട സിനിമകളിലൊന്ന് ലാപതാ ലേഡീസ് ആണ്. മധ്യപ്രദേശിലെ ദരിദ്ര ഗ്രാമീണലോകം ആ സിനിമയുടെ അകക്കാമ്പിനോടു ചേർന്നു നിൽക്കുന്നു. ഇപ്പോൾ വായിച്ചുതീർത്ത നോവൽ Selva Almadaയുടെ Not A River ആണ്. കഥ നടക്കുന്ന തുരുത്ത് അതിന്റെ ഉള്ളിനോടു പറ്റിച്ചേർന്നിരിക്കുന്നു.

ഇതെല്ലാം കൊണ്ടുതന്നെ സിനിമകൾ ആലോചിക്കുമ്പോൾ തന്നെ അതു സംഭവിക്കേണ്ട സ്ഥലത്തെക്കുറിച്ചും ആലോചിക്കാറുണ്ട്. പക്ഷേ, അത് നമ്മുടെ മാത്രം ആലോചനയല്ല. സിനിമ സംവിധായകന്റെ കലയാണ്. അതോടൊപ്പം ഒരു കൂട്ടായ്മയുടെ കലയുമാണ്. പലരുടെയും ആശയങ്ങളും ചിന്തകളും ഒത്തുചേരുമ്പോൾ ആരും വിചാരിക്കാത്ത മെച്ചം അതിന്റെ സൗന്ദര്യാംശത്തിനുണ്ടാകാം. ചിലപ്പോൾ എല്ലാം ചിതറി പലവഴി യായിപ്പോകാനും മതി. ലൊക്കേഷൻ കണ്ട ത്താൻ പലവഴിക്കു പലരും നടത്തുന്ന യാത്രകൾ നമ്മൾ ചെയ്യാൻ പോകുന്ന സിനിമയെത്തന്നെ മാറ്റിമറിച്ചേക്കാം. കണ്ടെത്തുന്ന സ്ഥലങ്ങൾക്കനുസരിച്ച് എഴുതിയ തിരക്കഥയിൽ കൂടുതൽ മാറ്റങ്ങൾ വരാം. സിനിമ എടുക്കുന്ന രീതിയെത്തന്നെ ആ സ്ഥലം സ്വാധീനിച്ചേക്കാം.

നൻപകൽ നേരത്ത് മയക്കം കണ്ടിഷ്ടപ്പെട്ടവരെല്ലാം അതിന്റെ സ്ഥലത്തെക്കുറിച്ച് ധാരാളം സംസാരിക്കുന്നതു കേട്ടിട്ടുണ്ട്. വളരെ യാദൃച്ഛികമായാണ് പളനിക്കടുത്തുള്ള മഞ്ചനായ്ക്കൻപട്ടി ആ സിനിമയുടെ ലൊക്കേഷനായി മാറിയത്.