Sporty Born E-SUV

ഇവി എസ്യുവി ആയിത്തന്നെയാണു ബിവൈഡി ആറ്റോ 3 യുടെ ജനനം.

- പ്രവീൺ

ചരിത്രം മാറ്റിമറിച്ച വെടിമരുന്ന്  ലോകമെങ്ങും എത്തിയതു ചൈനയിൽ നിന്നാണ്. വാഹന ലോകത്ത് മാറ്റമുണ്ടാക്കിയ ലിഥിയം അയോൺ ബാറ്ററിയുടെയും കയറ്റുമതിക്കാർ ചൈനക്കാർ തന്നെ. ഈ രംഗത്തു മുന്നിട്ടുനിൽക്കു ന്നൊരു കമ്പനിയെ നമുക്കറിയാം. ബിവൈഡി (ബിൽഡ് യുവർ ഡ്രീം). അമേരിക്കൻ കമ്പനിയായ ടെസ്ല, ജാപ്പനിസ് ഭീമൻമാരായ സുസുക്കി, ടോയോട്ട എന്നിവർക്കു ബാറ്ററി നൽകുന്ന കമ്പനിയാണു ബിഡി. ബാറ്ററി മാത്രമല്ല, ടെസ്ലയെ വെല്ലുവിളിക്കുന്ന ഇവി കാറുകളും ബിഡിയുടേതായിട്ടുണ്ട്. എക്സ്പോയിൽ അത്തരത്തിലുള്ള സീൽ എന്ന സെഡാൻ അവതരിപ്പിച്ചിരുന്നു. ബിവൈഡി ഇന്ത്യൻ വിപണിയിലിറക്കുന്ന രണ്ടാം മോഡലാണ് ആറ്റോ. ഒരു കുഞ്ഞു ഡ്രാഗൺ, ഡിസൈനിൽ മാത്രമല്ല, പെർഫോമൻസിലും ഡ്രാഗൺ ആയ ആറ്റോ ത്രീയുമായി എല്ലാ പ്രതലങ്ങളിലും യാത്ര ചെയ്തുവരാം.

 ചുരുക്കത്തിൽ

ബിവൈഡിയുടെ ഇന്ത്യയിലെ ആദ്യ മോഡൽ ഇ6  ശാന്തസ്വഭാവി ആയിരുന്നെങ്കിൽ ആറ്റോ ത്രീ ഒരു വെടിക്കെട്ടാണ്. മലിനീകരണമില്ലാത്ത ചൈനീസ് വെടിക്കെട്ട്. സ്പോർട്ടി SUV . ആറ്റോ ത്രീ കയ്യിൽ കിട്ടുമ്പോൾ 89 % ബാറ്ററി ഉണ്ടായിരുന്നു. റേഞ്ച് കാണിച്ചത് 431 കിമീ. എആർഎഐ സർട്ടിഫൈഡ് റേഞ്ച് 521 കിമീ. ഫുൾ ചാർജിൽ കേരളത്തിന്റെ തെക്കുവടക്ക് മുക്കാൽദൂരം സഞ്ചരിക്കാം. യഥാർഥ റേഞ്ച് എത്രയാണ്?

ഡിസൈൻ

ഡ്രാഗൺ മുഖത്തിൽനിന്നു പ്രചോദിതമാണ് മുൻവശം. ചെറുതെങ്കിലും ക്രൗര്യം നിറഞ്ഞ എൽഇഡി ലാംപും പുരികമായി പകൽക്കണ്ണും. പ്രീമിയം ഫിനിഷുള്ള എസ് യു വി ബോഡി. നീളത്തിൽ സിട്രൺ സി 5 വുമായി താരതമ്യം ചെയ്യാം (ആറ്റോ 3- 4455, സി 5 4500 mm). കാഴ്ചയിലേ ചെറുപ്പമുള്ളൂ. പോകും വഴിയെല്ലാം കണ്ണു കൾ ആറ്റോ ത്രീയെ പിന്തുടർന്നിരുന്നു. ശിൽപവടിവുതന്നെ കാരണം. തട്ടു തടവുമില്ലാത്ത ബോഡിയുടെ ഡാഗ് കോഎഫിഷ്യന്റ് മൂല്യം 0.29 Cd (എയ്റോഡൈനാമിക് അളവു കോൽ). കണക്റ്റഡ് ടെയിൽ ലാംപിലും ഷോൾഡർ ലൈനിലും ക്രോം ഫിനിഷുണ്ട്. ടെയിൽഗേറ്റ് നിയന്ത്രിക്കാൻ ബട്ടണുകളാണ്.