વર્ષાઋતુમાં ખીલી ઊઠતું રંગીલું રાજ્ય

કાળા ભમ્મર મેઘ વિશાળ આકાશમાં છવાતા જાય છે. વેગથી વાતો પવન અડાબીડ જંગલનાં વૃક્ષોમાં એક કંપન ઉત્પન્ન કરી જાય છે. પંખીઓ મૌન છે. લાંબા સમયથી તરસી ધરતી પણ જાણે પોતાનો શ્વાસ રોકીને બેઠી છે વીજળીના કડાકાભડાકાના અવાજની પ્રતીક્ષામાં. હા, અવાજ... સૃષ્ટિને જીવન આપતી ઋતુ એટલે કે પહેલા વરસાદના સંદેશાનો અવાજ

ચોમાસાની ઋતુમાં ખીલી ઊઠતું રાજસ્થાનનું સૌદર્ય હજી પણ વિશ્વથી છૂપું છે. ભારતનાં સૌથી વધુ ગરમ રાજ્યોમાંના એક એવા રાજસ્થાનમાં પ્રવાસીઓ શિયાળાની મોસમમાં મોટી માત્રામાં ઊમટી પડે છે, પણ ચોમાસામાં સૌંદર્ય અને પ્રકૃતિનું કેન્દ્રબિંદુ બની જતા મરુભૂમિના રાજ્ય વિશે વર્ષાઋતુમાં માણવા જેવાં અહીંનાં છૂપા ખજાના જેવા સ્થળો વિશે અજાણ છે.