વાત વટે ચડી છે...

ભાજપના ઉમેદવાર તરીકે પુરુષોત્તમ રૂપાલાને હટાવવાની માગ વચ્ચે ખુદ રૂપાલાએ જ ૧૬મીએ ઉમેદવારીપત્ર ભરવાની જાહેરાત કરી છે ત્યારે ગુજરાતમાં ફરી એક હાઈ-પ્રોફાઈલ ડ્રામા જોવા મળે એવાં એંધાણ છે...

- કેતન ત્રિવેદી (અમદાવાદ)

લોકસભા ચૂંટણીનો પ્રચાર પુરજોશમાં શરૂ થઈ ચૂક્યો છે, પણ ગુજરાતમાં ચૂંટણીનો માહોલ હજુ રૂપાલા વિરુદ્ધ ક્ષત્રિય સમાજ સુધી જ અટકી ગયો હોય એવું લાગે છે. બે અઠવાડિયાંથી ચૂંટણીને લગતા સમાચારોમાં રૂપાલા અને આ વિવાદ જ કેન્દ્રસ્થાને છે, એને કારણે રાજકોટ સિવાયની બીજી પચ્ચીસ બેઠક પર શું ચાલી રહ્યું છે એ જાણવાની જાણે કોઈને પરવા જ ન હોય એવું ચિત્ર ઊપસી રહ્યું છે.

મંગળવાર, ૯ એપ્રિલની બપોરે આ લખાઈ રહ્યું છે ત્યારે ક્ષત્રિય સમાજની કરણી સેના પ્રદેશ ભાજપના કાર્યાલય કમલને ઘેરાવ કરવા જઈ રહી છે, પણ પોલીસતંત્ર એના આગેવાનોની અટકાયત કરીને આ કાર્યક્રમને સફળ ન થવા દે એ સ્વાભાવિક છે. કરણી સેના અને સમાજનાં વિવિધ સંગઠનો ઉપરાંત રાજકોટ, છોટા ઉદેપુર, કચ્છ જેવા રાજવી પરિવારોનાં નિવેદનો પણ રૂપાલા વિરુદ્ધ આવવાનાં શરૂ થઈ ગયાં છે. જો કે ખુદ રૂપાલાએ પોતે ૧૬ એપ્રિલે ઉમેદવારીપત્ર ભરવાના હોવાની જાહેરાત કરી દીધી છે ત્યારે સામે પક્ષે કરણી સેના અને અન્ય સંગઠનો રૂપાલાને હટાવવાની માગ પર અડીને બેઠાં છે.