മുറ്റം പുതപ്പിക്കാം പേൾ ഗ്രാസ്

മുറ്റത്തു പുൽത്തകിടി വിരിക്കുന്നതിനു പേൾഗ്രാസ് തിരഞ്ഞെടുക്കുമ്പോഴും പരിപാലിക്കുമ്പോഴും ശ്രദ്ധിക്കേണ്ട കാര്യങ്ങൾ അറിയാം

- ജേക്കബ് വർഗീസ് കുന്തം റിട്ട. പ്രഫസർ. ബോട്ടണി വിഭാഗം, ഭാരത് മാത കോളജ് എറണാകുളം

മുറ്റത്തു ലളിതമായി പരിചരിക്കാവുന്ന പുൽത്തകിടിയാണോ വേണ്ടത്? പേൾ ഗ്രാസ് തിരഞ്ഞെടുത്തോളൂ. വെയിലുള്ള ഇടത്തും ഭാഗികമായ തണലുള്ള ഇടത്തും പേൾ ഗ്രാസ് നന്നായി വളരും. കാർപെറ്റ് ഗ്രാസ് പോലെ ചിതൽ ശല്യമോ കുമിൾ രോഗമോ ഉണ്ടാകില്ലെന്ന ഗുണവുമുണ്ട്.

മുറ്റത്തെ പേൾ

പേൾ ഗ്രാസ് പുൽത്തകിടി ഒരുക്കുമ്പോൾ ചില കാര്യങ്ങൾ ശ്രദ്ധിക്കണം. പുൽത്തകിടി ഒരുക്കാൻ പുല്ലിന്റെ ഷീറ്റ് ആണ് ഉപയോഗിക്കുക. പതിഞ്ഞു വളരുന്ന ചെറിയ ഇലകളുള്ള പുല്ലിന്റെ ഷീറ്റ് ആണു വാങ്ങേണ്ടത്. കുത്തനെ ഇലകൾ ഉള്ളതു പാള പുല്ലാകും.

പുല്ലു നട്ടാണു ലോൺ ഒരുക്കുന്നതെങ്കിൽ തണൽ ഉള്ളിടത്തു രണ്ട് ഇഞ്ച് അകലവും നന്നായി വെയിൽ കിട്ടുന്നിടത്തു മൂന്ന് ഇഞ്ച് അകലവും നൽകി നടുക.