പരീക്ഷയ്ക്ക് വിജയം ഉറപ്പാക്കാം

പഠനത്തിൽ കഠിനാധ്വാനം പോലെ പ്രധാനമാണ് ഓർമയും. പരീക്ഷക്കാലത്തെ ധൈര്യമായി നേരിടാനും മിന്നും വിജയം നേടാനും ഈ കാര്യങ്ങൾ ശ്രദ്ധിക്കാം

- അഞ്ജലി അനിൽകുമാർ

എ ല്ലാം പഠിച്ചതാണ് അമ്മാ... പക്ഷേ, ചോദ്യ പേപ്പർ കിട്ടിയപ്പോഴേക്കും ആകെ ബ്ലാങ്ക് ആയ പോലെ. ഒന്നും ഓർത്തെടുക്കാനായില്ല. പരീക്ഷക്കാലമായാൽ മിക്ക വീടുകളിലും കേട്ടുവരുന്ന പല്ലവിയാണിത്. കുട്ടികളെ വഴക്കു പറഞ്ഞി ട്ടോ തല്ലിയിട്ടോ ഈ പ്രശ്നത്തിനു പരിഹാരം കാണാനാകില്ല. മറിച്ച് എന്താണ് അവരുടെയുള്ളിലെ യഥാർഥ പ്രശ്നമെന്നു തിരിച്ചറിയുകയാണു വേണ്ടത്. ഇതു വഴി കുട്ടികളിലെ ആത്മവിശ്വാസം വർധിക്കുകയും പരീക്ഷകളിൽ മികച്ച പ്രകടനം കാഴ്ചവയ്ക്കുകയും ചെയ്യും. വരാനിരിക്കുന്ന പരീക്ഷാ ദിവസങ്ങൾക്കായുള്ള ഒരുക്കങ്ങൾ ആരംഭിച്ചാലോ? ആവർത്തനം: പഠിച്ചതു പല തവണ ആവർത്തിച്ചു വായിച്ചുറപ്പിക്കുന്നതു നല്ലതാണ്. ഉദാഹരണത്തിന് പുതിയ ഒരു വാക്കു പഠിച്ചെന്നു കരുതുക. ആ വാക്കു വാചകത്തിൽ ഉൾപ്പെടുത്തി ഉപയോഗിച്ചു നോക്കാം.

അപ്പോൾ ആ സന്ദർഭം കൂടി ഓർമയിൽ ഉറയ്ക്കും. അതുകൊണ്ട് റിവിഷനും പ്രാക്ടീസും അൽപം കൂടിയാലും കുഴപ്പമില്ല. പഠിക്കുന്നതൊക്കെ ലോങ് ടേം മെമ്മറിയി ലേക്കു ശേഖരിക്കപ്പെടുന്നുണ്ട്.

ചങ്കിങ് രീതി വലിയൊരു ചാക്ക് സാധനം മാറ്റി വയ്ക്കണമെന്നു കരുതുക. ഒന്നിച്ചുയർത്താൻ കഴിയാത്തതു കൊണ്ട് നമ്മൾ അത് സ്പിറ്റ് ചെയ്തു പലതാക്കി എടുത്തു മാറ്റിവയ്ക്കാറില്ലേ. അതു പോലെയാണ് അറിവും. നീളവും സങ്കീർണതയും ഉള്ള വാചകങ്ങളും സമവാക്യങ്ങളും സ്പ്ലിറ്റ് ചെയ്തു പഠിക്കുന്ന രീതിക്കാണ് ചങ്കിങ് എന്നു പറയുന്നത്. കാര്യം വ്യക്തമായി മനസ്സിലാകാൻ ഒരു ഉദാഹരണം കൂടി പറയാം. ആധാർ കാർഡിലെ 12 അക്ക നമ്പർ മനഃപാഠമാക്കാൻ ശ്രമിച്ചാൽ ചിലപ്പോൾ ബുദ്ധിമുട്ടാകും.

എന്നാൽ അതിനെ നാല് അക്കങ്ങൾ ഉള്ള മൂന്നു പീസാക്കി ഓർമിക്കാൻ നോക്കു. രണ്ടോ മൂന്നോ വട്ടം അതു താളത്തിൽ പറയുകയുമാകാം. ഇതേ തന്ത്രം തന്നെ പഠനത്തിലും ഉപയോഗിക്കാം.

ചുരുക്കെഴുത്തുകൾ: ഓർത്തിരിക്കേണ്ട വിവരങ്ങൾ ചെറിയ സൂത്രവാക്യങ്ങളിൽ ഒളിപ്പിച്ച് ഓർത്തുവയ്ക്കുന്ന വിദ്യയാണ് ന്യുമോണിക്സ്. ഓർത്തുവയ്ക്കേണ്ട വാചകത്തിന്റെ ആദ്യ അക്ഷരങ്ങൾ ചേർത്തുണ്ടാക്കുന്ന ചുരുക്കെഴുത്തിനെ അക്രോണിമുകൾ എന്നു പറയും. നോർത്ത്, ഈസ്റ്റ്, വെസ്റ്റ്, സൗത്ത് എന്നതിന്റെ ഷോർട് ഫോം ആയ ന്യൂസ് ചുരുക്കെഴുത്തിന് ഉദാഹരണമാണ്.

ചെയിനിങ് പഠിക്കാനുള്ള വിവരങ്ങളെ പരസ്പരം ബന്ധിപ്പിക്കുന്ന ഒരു കഥ മെനഞ്ഞെടുക്കുന്നതിനെ ചെയിനിങ് എന്ന് പറയുന്നു.