நட்பின்றி வாழ்தலில் என்ன பயன்?

வாழ்க்கையை அழகூட்டுவது என்று யாராவது என்னைக் கேட்டால் கண்ணை மூடிக்கொண்டு சொல்வேன், அது நட்பு. நட்பு ஒன்றுதான் வாழ்வின் கணங்களை வளமையாக, இளமையாக வைத்துக் கொள்கிறது.

- ராசி. அழகப்பன், இயக்குநர், எழுத்தாளர்

'என்ன இவன் இப்படி பேசுகிறான்?' என்று நீங்கள் வியந்து பார்க்கக்கூடும்.

நட்பை தவிர வேறு ஒன்றுமில்லையா? அதைத் தாண்டி உயரிய உறவுகள் இல்லையா? என்று கேட்கக் கூடும்.

எல்லா உறவுகளுக்கும் ஒரு கால கட்டம் உண்டு. எல்லை உண்டு. ஆனால் நட்புக்கு அது இல்லை. நட்பென்றதும் பழகியவர்கள், தெரிந்தவர்கள், அறிமுகமானவர்கள், இவர்கள் எல்லோரையும் 'நட்பு' என்ற பட்டியலில் சேர்த்து விடாதீர்கள்.

நட்பு, நண்பன் என்பது வாழ்வில் சிலருக்கு ஒருவர் அல்லது ஓரிருவர் கிடைப்பார்கள். அவர்கள்தான் கால எல்லைகளைத் தாண்டி வருவார்கள்.

கல்லறை, சுடுகாடு வரை வந்து நின்று கண்ணீர் விடுகிற உறவுகள் எத்தனை பேர் என்று யோசித்துப் பாருங்கள்.

'வீடு வரை உறவு வீதி வரை மனைவி காடு வரை பிள்ளை கடைசி வரை யாரோ'? - என்று கவியரசு கண்ணதாசன் வாழ்க்கையின் தத்துவத்தை எளிதாக எடுத்துச் சொல்லி விட்டுப் போனார். ஆனால் கடைசி வரை யாரோ? என்ற வரிகளில் 'நட்பு' சேர்ப்பதுதான் சிறந்தது.

'நட்பு' எதையும் எதிர்பார்க்காதது. எந்த உணர்வையும் தடையின்றி பகிர்ந்து கொள்ள காத்திருக்கும் இதயம்.

பருவ காலங்களில் ஒன்றாக ஓடி திரிந்து இருப்போம். திருமணம் ஆனதும் அதற்கு இடைவெளி வந்திருக்கும்.

பார்ப்பது குறையும், பேசுவது குறையும், நினைவுகள் மட்டும் பசுமையான ஈரத்தோடு உறவாடி இருக்கும். நீங்கள் உங்கள் வாழ்க்கையை கொஞ்சம் நினைத்துப் பாருங்கள். தவித்து நின்ற காலங்களில் தேவைப்படும் அனுசரணையான சொல்லைச் சொல்லி நம்பிக்கை தந்தது நண்பன் என்பது புரியும்.

கோப்பெருஞ்சோழன், பிசிராந்தையார் நட்புக்கு சொல்லப்படும் பெயர்கள். இவர்கள் ஒருவரை ஒருவர் பார்த்துக் கொண்டதில்லை. ஆனால் எண்ணம் ஒன்றாகப் பாவித்ததன் பயன் பாராமல் பற்று கொண்ட வாழ்வியலாக மாறியது. இவையெல்லாம் ஏதோ மிகையாகப் பேசப்படுகிற சொற்கள் என்று நாம் கூட பல சமயத்தில் நினைப்பதுண்டு. ஆனால் அது உண்மை என்று அறிய நமக்கே ஒரு அனுபவம் தேவைப்படுகிறது.

வெறுங்கையோடு தன்னம்பிக்கை மட்டுமே பொருள் என்று எண்ணிக் கொண்டு ஆசிரியர் கே.எச். அரிகிருட்டிணன் வழிகாட்டுதலில் சென்னை மாநில கல்லூரியில் படிக்க வந்தேன். செனாய் நகர் அரசு மாணவர் விடுதியில் தங்கினேன். ஆனால் ஒரு கல்லூரி போராட்டக் களத்தில் எனக்கு கிடைத்த நண்பன்தான் எனது வாழ்வின் அனைத்துக்குமான ஆதார சுருதியானான்.