കെ.സി. എന്ന രണ്ട് അക്ഷരം

ഇന്ത്യൻ രാഷ്ട്രീയത്തിൽ നിറ ഞ്ഞു നിൽക്കുന്ന സൗമ്യമുഖം കെ.സി. വേണുഗോപാൽ മലയാളത്തിന്റെ അഭിമാനമാവുകയാണ്.

- സജിൽ ശ്രീധർ

ആരാണ് കെ.സി. വേണുഗോപാൽ ഔദ്യോഗിക നിർവചനം കണക്കിലെടുത്താൽ ഇന്ത്യൻ നാഷനൽ കോൺഗ്രസിന്റെ സംഘടനാപരമായ ചുമതലയുള്ള ജനറൽ സെക്രട്ടറി. കുറേക്കൂടി വ്യക്തമായി പറഞ്ഞാൽ ബി.ജെ.പി. കഴിഞ്ഞാൽ ഇന്ത്യയിലെ വലിയ രാഷ്ട്രീയ പ്രസ്ഥാനത്തിന്റെ ഏറ്റവും സുപ്രധാനമായ ചുമതല വഹിക്കുന്ന മലയാളി. കോൺഗ്രസിൽ ഏറ്റവും അധികാരവും സ്വാധീന ശേഷിയുമുള്ള ഒരു നേതാവ് മലയാളിയാണ് എന്നതിൽ വാസ്തവത്തിൽ നാം അഭിമാനിക്കുകയാണ് വേണ്ടത്. എന്നാൽ നിർഭാഗ്യവശാൽ സ്ഥാനത്തും അസ്ഥാനത്തും അദ്ദേഹത്തെ ആക്രമിക്കാനും ഇകഴ്ത്തിക്കാട്ടാനുമാണ് ചിലർ ശ്രമിക്കുന്നത്.

അദ്ദേഹത്തിന്റെ സവിശേഷതകൾ അർഹിക്കുന്ന തലത്തിൽ ചർച്ച ചെയ്യ പ്പെടുന്നില്ല എന്നതാണ് മറ്റൊരു ദുര്യോഗം.

എന്താണ് കെ.സി.യുടെ പ്രസക്തി? കേരളത്തിലെ കമ്മ്യൂണിസ്റ്റ് പാർട്ടിയുടെ പ്രാദേശിക നേതാക്കൾ അടക്കമു ളളവർ പി.ആർ. ഏജൻസികളുടെ സഹായത്തോടെ തങ്ങളുടെ വ്യക്തിമാഹാത്മ്യം ലോകോത്തര തലത്തിൽ കൊട്ടിഘോഷിക്കാൻ ബോധപൂർവം കരുക്കൾ നീക്കുമ്പോൾ ദേശീയ നേതാവായ കെ.സി. ഇന്നേവരെ മാധ്യമങ്ങളെയോ ഇതര പി.ആർ. ഏജൻസികളെയോ തിരിഞ്ഞു നോക്കിയിട്ടില്ലെന്ന് മാത്രമല്ല സക്രിയമായ തന്റെ സേവനങ്ങൾ നിശ്ശബ്ദമായി നിർവഹിക്കാൻ ശ്രമിക്കുക മാത്രമാണ് ചെയ്യുന്നത്. താൻ ഒരു മഹാസംഭവമാണെന്ന് സ്ഥാപിക്കാൻ അദ്ദേഹം ഒരിക്കലും ശ്രമിക്കുന്നില്ല. അണിയറയിലിരുന്ന് തന്നിൽ നിക്ഷിപ്തമായ ഉത്തരവാദിത്തം നിറവേറ്റുക മാത്രമാണ് അദ്ദേഹം ചെയ്യുന്നത്.