രമാഭായി അംബേദ്കർ

ഇതിഹാസത്തിലെ സ്ത്രീകൾ

- കണക്കൂർ ആർ. സുരേഷ്കുമാർ

നമ്മുടെ ഭരണഘടനയുടെ ശില്പികളിൽ പ്രമുഖനും ഇന്ത്യ കണ്ട മഹാവ്യക്തികളിൽ ഒരാളുമായ ഡോക്ടർ ബാബാസാഹേബ് അംബേദ്കറിന്റെ ആദ്യ ഭാര്യയായിരുന്നു രമാഭായി അംബേദ്കർ. രമാഭായിയുടെ ത്യാഗവും പിന്തുണയുമാണ് ഭീം എന്ന സാധാരണ വ്യക്തിയെ ഡോക്ടർ ഭീം റാവു അംബേദ്കർ എന്ന മഹാവ്യക്തിത്വമായി ഉയർത്തിയതെന്ന് പറയാം. എന്നാൽ ഈ സ്ത്രീരത്നത്തെക്കുറിച്ച് ചരിത്രപുസ്തകങ്ങളിൽ അധികമൊന്നും ചർച്ച ചെയ്യപ്പെട്ടിട്ടില്ല. ഒരു സ്ത്രീയായതു കൊണ്ടാകാം ഒരുപക്ഷേ, അവരെ ചരിത്രത്തിൽ കാര്യമായി രേഖപ്പെടുത്താതെ പോയത്.

ഇന്നത്തെ മഹാരാഷ്ട്രയിലുള്ള പലാങ്ങ് എന്ന ഗ്രാമത്തിൽ ബിക്കു ദോയുടെ മകളായി 1898-ൽ ആയിരുന്നു രമയുടെ ജനനം. മാതാവ് രുക്മിണി. പിതാവ് ബിദോഹ തുറമുഖത്തു നിന്ന് മത്സ്യമെടുത്ത് തലച്ചുമടായി ചന്തയിൽ കൊണ്ടുവന്ന് വിറ്റാണ് കുടുംബത്തെ പോറ്റിയിരുന്നത്.

രമയ്ക്ക് രണ്ട് വീതം സഹോദരന്മാരും സഹോദരിമാരും ഉണ്ടായിരുന്നു. രമയുടെ ചെറുപ്പത്തിൽ തന്നെ അസുഖം വന്ന് അമ്മയും കുറച്ചുകാലം കഴിഞ്ഞപ്പോൾ അച്ഛനും മരണത്തിന് കീഴടങ്ങി. തുടർന്ന് ബോംബെയിലുള്ള അമ്മാവന്മാരാണ് കുട്ടികളെ വളർത്തിയത്.