ராணுவ தளபதியை விமர்சித்து பதவி இழந்த பிரதமர் !!

சர்வதேச அளவில் தற்போது ஹாட் டாபிக் ஆக மாறியிருப்பவர் தாய்லாந்து பிரதமராக இருந்து பதவி நீக்கம் செய்யப்பட்ட பேடோங்டர்ன் ஷினவத்ராதான்.

- 

ஒரே ஒரு தொலைபேசி உரையாடல் லீக் ஆகி அவரது அரசியல் வாழ்க்கையை தலைகீழாக புரட்டிப் போட்டிருக்கிறது.

எதிரி நாட்டு முன்னாள் பிரதமரை அங்கிள் என்று கூப்பிட்டதும், சொந்த நாட்டு ராணுவ தளபதியை எதிரி என விமர்சித்ததும் தான் அவருக்கு எதிராக ஒட்டுமொத்த நாட்டையும் கொந்தளிக்கச் செய்தது.

அதன் எதிரொலியாக நம்பிக்கையில்லா வாக்கெடுப்பு நடக்கும் முன்னரே அந்நாட்டு அரசியல் சாசன நீதிமன்றம் அவரை பிரதமர் பதவியில் இருந்து இடைநீக்கம் செய்து விட்டது.

தாய்லாந்தில் முன்னாள் பிரதமர் தக்ஸின் ஷினவத்ரா மற்றும் முன்னாள் நீதித்துறை அமைச்சர் சாய்காசெம் நிதிசிரி ஆகியோரின் 3-வது மகள் தான் பேடோங்டர்ன் ஷினவத்ரா. 37 வயதில் பிரதமராக பதவி வகித்தவர்.

சிறுவயதிலிருந்தே அரசியலில் ஆர்வம் கொண்ட போதும் இவர், சர்ரே பல்கலைக்கழகத்தில் சர்வதேச ஹோட்டல் நிர்வாகத்தில் முதுகலைப் பட்டம் பெறுவதற்காக இங்கிலாந்து சென்றார்.

2019ஆம் ஆண்டு பிரபல தொழிலதிபரான பிடோக் சூக்சாவாஸை ஷினவத்ரா திருமணம் செய்துகொண்டார் இந்த தம்பதிக்கு இரண்டு குழந்தைகள் உள்ளன.

2016-ம் ஆண்டு தாய்லாந்தின் மிகப்பெரிய ஆளும் கட்சியான பேயு தாய் கட்சியின் ஒருங்கிணைந்த ஆலோசனைக் குழுவின் தலைவராக அறிவிக்கப்பட்டதன் மூலம் பேடோங்டர்ன் ஷினவத்ரா அரசியலுக்குள் நுழைந்தார்.

அந்த சமயத்தில் தேர்தலுக்கு முன்பு கட்சியின் மூன்று பிரதமர் வேட்பாளர்களில் ஒருவராக அவரின் பெயர் இடம்பெற்றது. அதன் பிறகு கடந்த ஆண்டு பேயு தாய் கட்சியின் தலைவராக அறிவிக்கப்பட்டார்.

தாய்லாந்தைப் பொறுத்த அளவில் அரச குடும்பத்தையும், ராணுவ கட்டமைப்பையும் எதிர்த்து எந்த ஆட்சியாளர்களும் பதவியில் நீண்ட காலம் நீடிக்க முடியாது.

தாய்லாந்தின் பிரிவினைவாத அரசியல் பிரமுகராக அறியப்படுவர் தக்ஸின். கடந்த 2006-ம் ஆண்டு ராணுவ சதி மூலமாக பதவியிலிருந்து இறக்கப்பட்டார். அதன் பிறகு தக்ஸினின் மைத்துனர் சோம்சாய் வோங்சாவத் 2008 ஆம் ஆண்டு சிறிதுகாலம் பிரதமராக இருந்தார். இதைத் தொடர்ந்து தக்ஸினின் சகோதரி யின்லிங் ஷினவத்ரா கடந்த 2011-ஆம் ஆண்டு முதல் 2014-ஆம் ஆண்டு வரை பிரதமராக இருந்தார்.