யானை வழித்தடம் மீட்கப்படுமா?

இந்தியாவில், குறிப்பாக தமிழ்நாட்டில் வன விலங்குகள் எண்ணிக்கை மளமளவென்று சரிகிறது.

- பரிதி

அதற்கு காரணம், மனிதர்களின் அத்துமீறல்.

விலங்குகளில் பெரியதும், காடு வளர உதவுவதுமான யானை, அது போகும் வழியெல்லாம் தடுக்கப் படுகிறது.

மனிதர்கள் வகுத்த சட்டங்கள் அவற்றுக்கு சலுகைகளாக அல்ல, கட்டுப்பாடுகளாகவே இருக்கின்றன.

கோவை மாவட்டத்தில் உள்ள மேற்குத் தொடர்ச்சி மலையின் பவுலுவம்பட்டி மலைத்தொடரின் அடிவாரத்தில் அமைந்துள்ள எட்டிமடையில் யானைகளின் நடமாட்டத்திற்கு இடையூறாக இரண்டு கிலோ மீட்டர் நீள மின் வேலி அமைக்கப்பட்டதாக தொடுத்த வழக்கில், மாதா அமிர்தானந்தமயி மடத்தை பிரதிவாதிகளில் ஒருவராக சென்னை உயர் நீதிமன்றம் தானாக முன்வந்து சேர்த்துள்ளது.

வன ஆர்வலர் சிவா தாக்கல் செய்த இந்த மனுவுக்கு பதிலளித்த கோவை கலெக்டர் பவன்குமார், விவசாய நோக்கங்களுக்காக பயன்படுத்தப்படும் 12.622 ஹெக்டேர் நிலத்தை, கல்வி நோக்கத்திற்காக மாற்றுவதற்காக 2023 ஏப்ரல் 3-ஆம் தேதி அமிர்தானந்தமயி மடம் விண்ணப்பித்ததாக நீதிமன்றத்தில் தெரிவித்தார்.

மடத்தால் நடத்தப்படும் நிகர்நிலை பல்கலைக்கழக வளாகம் காப்புக் காடுகளின் எல்லையில் இருப்பதால் விண்ணப்பத்தை பரிசீலிப்பதற்கு முன்பு முதன்மை தலைமை வனப்பாதுகாவலரிடம் இருந்து தேவையான கருத்துகள் கோரப்பட்டன.

2024 ஜனவரி 18 அன்று, நிலங்களின் வகைப்பாட்டை மாற்றுவதற்கான 17 நிபந்தனைகளின் பட்டியலை வனத்துறை சமர்ப்பித்தது.

அதன் அடிப்படையில், 17 நிபந்தனைகளையும் கண்டிப்பாகப் பின்பற்ற வேண்டும் என்று உத்தரவிட்டு, மடத்திற்கு அனுமதி வழங்கியது.

அதன்படி, வனவிலங்குகள், குறிப்பாக யானைகள் சுதந்திரமாக நடமாடுவதற்காக, காப்புக் காடுகளின் எல்லையில் 150 மீட்டர் இடைவெளியில் ஒரு இடையக மண்டலத்தை பராமரிக்க வேண்டும் என்பது முக்கிய நிபந்தனையாகும்.

மற்றொரு நிபந்தனை, விண்ணப்பதாரரின் நிலத்தின் வழியாக உணவு மற்றும் தண்ணீருக்காக செல்லும் காட்டு விலங்குகளை தொந்தரவு செய்யக்கூடாது என்பது.

மேலும், மனுதாரரின் நிலத்தைச் சுற்றி வேலிகள் ஏதேனும் இருந்தால், அது தமிழ்நாடு மின் வேலிகள் (பதிவு மற்றும் ஒழுங்குமுறை) விதிகள், 2023-இன் படி மட்டுமே அமைக்கப்பட வேண்டும்.

காட்டு விலங்குகளின் சுதந்திரமான இயக்கத்தை தடுக்க தொடர்ச்சியான தடைகள் இருக்கக்கூடாது.