கண்டேன் காதலை!

வாசலில் கட்டியிருந்த 'மா இலை தோரணம் காற்றில் அசைந்தாடி 'சரக்சரக்'கென்ற சத்தத்தை எழுப்பிக் கொண்டிருக்க, அந்த வீட்டின் உள்ளும் மனிதர்களின் நடையின் உரசலில் 'சரக்சரக்' சத்தம் உருவாகி காற்றில் கலந்திருந்தது.

- சுஜாதா நடராஜன

"மணி...பூந்தி போட்டாச்சா பாரு டா" என்றபடியே வந்த ஜானகியிடம்,

"போட்டாச்சு அக்கா ஆறப்போட்டிருக்கு. நீ பதட்டப்படாம அமைதியா கொஞ்ச நேரம் உட்காரு.'

"எப்படிடா அமைதியா உட்கார முடியும் ? நம்ம வீட்டோட முதல் கல்யாணம். எல்லாம் நல்லபடியா நடக்கணுமேன்ணு பயமா இருக்கு.'

"அதெல்லாம் சரியா தான் நடக்கும்” என்றவர் கூறிக் கொண்டிருக்கும் போது,

"நாங்க உள்ள வரலாமா?” என்ற குரல் கேட்டது. இருவரும் திரும்பி பார்க்க பெண் வீட்டை சேர்ந்த முக்கிய உறவுகளில் சிலரும் பெண்ணின் தந்தையும் வாசலில் நின்றிருந்தனர்.

அடடே சம்பந்தி வாங்க வாங்க என்று அழைத்தபடியே வாசலை நெருங்கினார் ஜானகி. அவரை மணி தொடர, வந்தவர்கள் மரியாதை நிமித்தமாக வணங்கினர்.