ഇവിടെ ജീവിതം കാർണിവൽ പോലെ

ലാറ്റിൻ അമേരിക്കൻ യാത്രകൾ സംസ്കാരങ്ങളിലൂടെയും വിസ്മയങ്ങളിലൂടെയുമുള്ള സഞ്ചാരമാണ്. ജീവിതം ആഘോഷമാക്കുന്ന മനുഷ്യർക്കിടയിലൂടെ, രണ്ട് ലോകാദ്ഭുതങ്ങൾ കണ്ട്, മൂന്ന് രാജ്യങ്ങളിലൂടെയുള്ള സഞ്ചാരം

- BALRAM MENON

ലോകം ലോക്ഡൗണിലേക്ക് ചുരുങ്ങിയപ്പോൾ മനസ്സ് ലാറ്റിനമേരിക്കയിൽ പറന്നു നടക്കുകയായിരുന്നു. തെക്കേ അമേരിക്കൻ രാജ്യങ്ങൾ കാണാനും അവയെക്കുറിച്ച് കൂടുതൽ അറിയാനുമുള്ള അടങ്ങാത്ത ആഗ്രഹം. വീട്ടിലേക്ക് ഒതുങ്ങിയപ്പോഴും, പോസിറ്റീവ് എനർജി പകർന്നത് ആ സ്വപ്നങ്ങളായിരുന്നു. പ്രശ്നങ്ങളെല്ലാമൊതുങ്ങി ലോകം മുഴുവൻ പൂർവസ്ഥിതിയിലേക്ക് മടങ്ങിയപ്പോൾ മനസ്സിൽ ഉറപ്പിച്ചു. അടുത്ത റിയോ കാർണിവലിൽ ബ്രസീലിന്റെ ആട്ടവും പാട്ടും ആസ്വദിക്കുന്ന ലക്ഷക്കണക്കിന് ആളുകളുടെ കൂട്ടത്തിൽ ഞാനും ഉണ്ടാവുമെന്ന്.

സോളോ ട്രിപ്പ്, അത്ര എളുപ്പമാവില്ലെന്നറിയാം. എഴുതിയും തിരുത്തിയും അവസാനം ബ്രസീൽ എന്ന ഒരു രാജ്യത്തേക്കുള്ള സ്വപ്നയാത്ര മൂന്ന് ലാറ്റിൻ അമേരിക്കൻ രാജ്യങ്ങളിലേക്കായി വളർന്നു. ബ്രസീൽ, പെറു, ബൊളീവിയ

 ട്രോളി ബാഗും ബാക്ക് പാക്കും ഒരു ലോഡ് സ്വപ്നങ്ങളുമായി കൊച്ചി വിമാനത്താവളത്തിൽ നിന്ന് ദുബായിലേക്ക്. അവിടെ നിന്ന് പാരീസ്. പാരീസിൽ കുറച്ചുദിവസം കറങ്ങിയശേഷം നേരേ ബ്രസീലിലേക്ക്. റിയോ ഡി ജനൈറോ, ലോകത്തിലെ ഏറ്റവും വലിയ കാർണിവൽ നടക്കുന്ന നഗരം, ക്രൈസ്റ്റ് ദ റെഡിമർ സ്ഥിതിചെയ്യുന്ന സ്ഥലം. ലോകാദ്ഭുതങ്ങളിലൊന്നായ ഈ പ്രതിമ കോർക്കോവാ ഡോ പർവതത്തിലാണ് സ്ഥിതിചെയ്യുന്നത്. പോർച്ചുഗീസുകാരിൽ നിന്ന് ബ്രസീലിന് സ്വാതന്ത്ര്യം കിട്ടിയതിന്റെ നൂറാംവർഷത്തിലാണ് ഇത് ബ്രസീലിന് സ്വന്തമായത്. ഇവിടത്തെ ഷുഗർലോഫ് മൗണ്ടൻ വളരെ പ്രശസ്തമാണ്. ഷുഗർലോഫ് മൗണ്ടനിൽ നിന്നാൽ റിയോ നഗരത്തിന്റെ ഭംഗി മുഴുവൻ കാണാം.

ഈസ്റ്റർ നൊയമ്പ് തുടങ്ങുന്നതിന് മുൻപുള്ള ഏറ്റവും വലിയ ആഘോഷം. അതാണ് റിയോ കാർണിവൽ. ഈസ്റ്ററിന് 51 ദിവസം മുൻപ് തുടങ്ങും. അഞ്ചു ദിവസം നീണ്ടുനിൽക്കും. എവിടെ നിന്നൊക്കെയോ ഒഴുകിയെത്തുന്ന സാംബാ സംഗീതവും നർത്തകരും ‘ബ്ലോക്സ്' എന്നറിയപ്പെടുന്ന സ്ട്രീറ്റ് പാർട്ടികളും ന ഗരത്തിൽ അവിടവിടെയായി നടത്തുന്ന പ്രീ കൺസെർ ട്ടുകളും ജീവിതം ആഘോ ഷമാക്കുന്ന കുറേ മനുഷ്യരും. ഇതെല്ലാം ചേർന്ന് അഞ്ചുദിവസങ്ങൾ റിയോഡി ജനൈറോ നഗരത്തെ ഒരു സ്വർഗമാക്കി മാറ്റി.