ഫാൻസിപാനിലെ ആകാശവിസ്മയം

വിയറ്റ്നാമിലെ ഏറ്റവും വലിയ കൊടുമുടിയുടെ തുഞ്ചത്ത് ജീവൻ കൈയിൽപ്പിടിച്ചൊരു സാഹസിക കേബിൾ കാർ യാത്ര

-  DR.MITRA SATHEESH

യാത്രകൾ ഹരമാകുന്നതിന് കാലങ്ങൾക്കു മുന്നേ മനസ്സിൽ കയറിക്കൂടിയതാണ് വിയറ്റ്നാമിലെ ഫാൻസി പാൻ കൊടുമുടിയി ലേക്കുള്ള കേബിൾ കാർ യാത്ര. അതുകൊണ്ടുതന്നെ വിയറ്റ്നാം യാത്ര നിശ്ചയിച്ചപ്പോൾ ആദ്യം പോകേണ്ടത് എവിടേക്കെന്ന കാര്യത്തിൽ സംശയമില്ലായിരുന്നു.

മുകൾഭാഗം താരതമ്യേന വീതികൂട്ടി എഴുതിയ 'ട' എന്ന അക്ഷരത്തിനു സദൃശമായാണ് വിയറ്റ്നാമിന്റെ കിടപ്പ്. മലനിരകളും തട്ടുതട്ടായി കൃഷിചെയ്യുന്ന നെൽപ്പാടങ്ങളും കൊണ്ട് സമൃദ്ധമാണ് സാപ പ്രദേശം. പുലർച്ചെ ഒരുമണിക്ക് കൊച്ചിയിൽനിന്ന് ഫ്ളൈറ്റിൽ പുറപ്പെട്ടു. സിങ്കപ്പൂരിൽനിന്ന് വിമാനം മാറിക്കയറി. വിയറ്റ്നാമിന്റെ തലസ്ഥാനമായ ഹാനോയിലെത്തിയപ്പോൾ വൈകിട്ട് ഏഴുമണി. രാത്രി ഒമ്പതിന് സാപയിലേക്കുള്ള ബസ്സിൽ കയറി. അഞ്ചുമണി ചുവപ്പ് റാന്തൽ വിളക്കുകൾകൊണ്ടലങ്കരിച്ച സാപയിലെ ഹോട്ടലിന്റെ മുന്നിൽ ബസ് നിന്നപ്പോൾ ഗൈഡ് കാത്തുനിൽപ്പുണ്ടായിരുന്നു. മോങ് ഗോത്രവർഗക്കാരിയായ ഈ ഗൈഡിന്റെ വീട്ടിലാണ് താമസമേർപ്പാടാക്കിയിരുന്നത്.

കോടമഞ്ഞും മലകളും

ചുറ്റും കോടമഞ്ഞുപൊതിഞ്ഞ മലകൾ, അവയെ ചു റ്റിപ്പോകുന്ന വീതികുറഞ്ഞ റോഡ്, ഇടയ്ക്കിടയ്ക്ക് പ്രത്യക്ഷപ്പെടുന്ന ചെറിയ വെള്ളച്ചാട്ടങ്ങൾ, വീടുകൾ, ഹോംസ്റ്റേകൾ, ചെറിയ ഹോട്ടലുകൾ... എല്ലാം കൂടി മൂന്നാറിലെത്തിയ പ്രതീതി. മോങ് ഗോത്രക്കാർ ചൈനയിലെ മലയോരകർഷകരായിരുന്നു. ചൈനീസ് ഭരണാധികാരികളുടെ ക്രൂരതയ്ക്കുമുന്നിൽ പിടിച്ചുനിൽക്കാൻ കഴിയാതെ വന്നപ്പോഴാണ് ലാവോസ്, മ്യാൻമാർ, വിയറ്റ്നാം തുടങ്ങിയ തെക്കൻ രാജ്യങ്ങളിലേക്ക് കുടിയേറാൻ അവർ നിർബന്ധിതരായത്.

കോൺക്രീറ്റ് ചെയ്ത വീതികുറഞ്ഞ റോഡുകളായിരുന്നു ഗ്രാമത്തിലുടനീളം, സ്ത്രീകൾ പാടത്തിടുന്ന ഗം ബൂട്ട്സ് ധരിച്ച്, മുളയുടെ കുട്ട ചുമലിൽ കെട്ടിവെച്ച് ബൈക്കോടിച്ചു പോകുന്ന സർവസാധാരണമായ കാഴ്ചയിരുന്നു.

ഏതുദിശയിലേക്ക് നോക്കിയാലും ചക്രവാളത്തിലേ നീണ്ടുകിടക്കുന്ന പർവതങ്ങളുടെ കുത്തനെയുള്ള വശങ്ങൾ കാണാം. അതിൽ തട്ടുതട്ടുകളായി കൊത്തിയെടുത്ത ആയിരക്കണക്കിന് നെൽപ്പാടങ്ങളും. ദൂരെ ഒരു കുടിലിന്റെ മുൻപിൽ ചുവന്ന തലപ്പാവണിഞ്ഞ റെഡ്ഡാവോ' എന്ന ഗോത്രവർഗക്കാരിയെ കണ്ടു. പുരികവും തലമുടിയും വടിച്ച്, ചുവന്ന തലപ്പാവ് വെയ്ക്കുന്നതാണ് ഇവരുടെ പ്രത്യേകത.