ചെങ്കോമാളി

വർണങ്ങൾ വാരിവിതറി പൂവുകൾ തോറും പാറിനടക്കുന്ന ചിത്രശലഭങ്ങൾ എത്ര മനോഹരമായ കാഴ്ചയാണ്? ലോകത്ത് എത്രയോതരം ചിത്രശലഭങ്ങൾ ഉണ്ട്. അവയിൽ ചിലതിനെ പരിചയപ്പെടുത്തുന്ന പംക്തി.

- ഹനീഷ് കെ.എം. ഫോൺ : 9731121921

വെളുത്ത ചിറകിൽ ചുവപ്പും കറുപ്പും പൊട്ടുകളോടു കൂടിയ മനോഹരമായ ഒരു ചെറിയ ശലഭമാണ് ചെങ്കോമാളി. സർക്കസിലെ കോമാളികളെപ്പോലെ വെളുപ്പിൽ കറുത്തപൊട്ടുകളുള്ള ആകർഷകമായ രൂപമാണ് ശലഭത്തിന്റെ ഈ പേരിന് കാരണം. ഇന്ത്യൻ ഉപഭൂഖണ്ഡത്തിലും തെക്കുകിഴക്കേ ഏഷ്യയുടെ പലഭാഗങ്ങളിലും കാണപ്പെടുന്ന നീലിശലഭ കുടുംബത്തിൽപ്പെട്ട ചെങ്കോമാളിയുടെ ചിറകുകൾക്ക് മൂന്നു മുതൽ മൂന്നര സെന്റീ മീറ്റർ വരെ മാത്രമേ ചിറകകലം ഉണ്ടാവുകയുള്ളൂ. അധികം വേഗത്തിലും ഉയരത്തിലും പറക്കാത്ത ഈ ശലഭങ്ങൾ സാധാരണയായി തുറസ്സായ സ്ഥലങ്ങളിലും കാടുകൾക്ക് പുറത്തുള്ള അധികം വെയിലില്ലാത്ത സ്ഥലങ്ങളിലുമാണ് കാണുന്നത്.