മേടം 10ന് ജനിച്ചാൽ രാജതുല്യപദവി

ഗ്രഹനില

- സി.സദാനന്ദൻ പിള്ള, എരുവ

മാനവരാശിയുടെ ജീവിത ഗതിവിഗതികളിൽ നിർണ്ണായക സ്വാധീനം ചെലുത്തുകയും, നഗ്നനേത്രങ്ങൾ കൊണ്ട് കാണാൻ കഴിയുകയും, ജീവചൈതന്യത്തിന്റെ ഊർജ്ജസ്രോതസ്സായി വിരാജിക്കുകയും ചെയ്യുന്ന സൂര്യന്റെ സൂക്ഷ്മചലനങ്ങളെ ആധാരമാക്കി ഗണിക്കപ്പെടുന്ന സവിശേഷമുഹൂർത്തമാണ് മേടസംക്രമം അഥവ വിഷുസംക്രമം. ലോകമെമ്പാടുമുള്ള കേരളീയർ ഓണത്തെപ്പോലെ തന്നെ നെഞ്ചിലേറ്റി ആഘോഷിക്കുന്ന മറ്റൊരു പുണ്യദിനം കൂടിയാണ് വിഷു. കാലചക്രസ്വരൂപമായ രാശിചക്രത്തിന്റെ ആരംഭ ബിന്ദുവായ മേടം രാശിയിലേക്ക് കാലാത്മാവും മേടത്തിന്റെ ഉച്ചാവകാശിയുമായ സൂര്യൻ സംക്രമിക്കുന്ന ദിവ്യമുഹൂർത്തവുമാണ് വിഷു.

സമ്പദ് സമൃദ്ധിയുടെയും ഐശ്വര്യത്തിന്റെയും സാന്നിദ്ധ്യം പകർന്ന് കണിക്കൊന്ന് നിറശോഭ യോടെ പൂത്തല്ലസിക്കുന്ന സമയം നല്ല നാളെയെക്കുറിച്ച് മനുഷ്യരാശിക്ക് പ്രതീക്ഷ നൽകുന്ന ഒരു വർഷത്തിന്റെ ആരംഭദിവസം, കാർഷികവിളവെടുപ്പിന്റെ ഉത്സവം തുടങ്ങിയവയും വിഷുവിനെ വളരെയേറെ ശ്രേഷ്ഠമാക്കുന്നു.