சாணக்கியனின் பிரேரணையை நிறைவேற்ற ஏன் தாமதம்?

மாகாண சபைத் தேர்தலை பழைய முறையில் நடத்துவதற்கான சூழலை உருவாக்கும் பிரேரணையையே தனிநபர் பிரேரணையாக தமிழரசுக் கட்சியின் பாராளுமன்ற உறுப்பினர் இராசமாணிக்கம் சாணக்கியன் பாராளுமன்றில் தாக்கல் செய்திருக்கிறார். எனவே அந்தப் பிரேரணையை நிறைவேற்றுவதன் ஊடாக மாகாண சபைத் தேர்தலை பழைய முறைமையில் நடத்த முடியும்.

- 

மாகாண சபைத் தேர்தல் தொடர்ந்து தாமதமடைந்து வருகின்றமை தொடர்பில் தொடர்ச்சியாக பல்வேறு தரப்பினரும் அழுத்தங்களைப் பிரயோகிக்க ஆரம்பித்திருக்கின்றனர். மாகாண சபைத் தேர்தலை அடுத்த வருடம் நடத்துவோம் என அரசாங்கத் தரப்பில் தெரிவிக்கப்பட்டாலும் அதற்கான உத்தியோகபூர்வ அறிவிப்பு எதுவும் இன்னும் வெளியாகவில்லை.

எனவே அரசாங்கம் அடுத்த வருட ஆரம்பத்தில் அல்லது நடுப் பகுதியில் மாகாண சபைத் தேர்தலை நடத்துமா என்பது இன்னும் உறுதியில்லை. மாகாண சபை தேர்தல் என்பது தற்போது வெறும் கானல் நீராகி வருகிறதா என்ற கேள்வி எழுகிறது.

இது இவ்வாறிருக்க மாகாணசபைத் தேர்தல் தொடர்பில் அரசாங்கம் உட்பட சகல அரசியல் கட்சிகளும் வெகு விரைவில் தத்தமது நிலைப்பாடுகளை அறிவிக்க வேண்டும் என சுதந்திரமானதும் நீதியானதுமான தேர்தல்களுக்கான மக்கள் இயக்கம் (கபே அமைப்பு) வலியுறுத்தியுள்ளது.

மாகாணசபை முறைமையை நீக்கும் நிலைப்பாட்டில் இருந்தால் அதனையாவது மக்களிடம் கூறுமாறு வலியுறுத்துகின்றோம். ஒரு மாதத்துக்கு முன்னர் எமது அமைப்பினால் மாகாணசபை தொடர்பில் கடிதம் அனுப்பி வைக்கப்பட்டுள்ளது. ஆனால் இன்னும் அதற்கு எவ்வித பதிலும் இல்லை. அதேவேளை அரசியல் கட்சிகளுக்கும் தாம் எதிர்க்கட்சியிலிருக்கும் போது மாத்திரமே மாகாணசபைத் தேர்தல் நினைவுக்கு வருகிறது. ஆனால் அவர்கள் ஆட்சியமைக்கும் போது அதனை மறந்து விடுகின்றனர் என்றும் கபே அமைப்பு சுட்டிக்காட்டியிருக்கிறது.

அந்த வகையில் தேர்தல் அமைப்புகள், அரசியல் கட்சிகள், சிவில் சமூக அமைப்புகள், மதத் தலைவர்கள் என பல்வேறு தரப்பினரும் மாகாண சபைத் தேர்தல் விரைவாக நடத்தப்பட வேண்டும் என்பதை வலியுறுத்துகின்றன. மாகாண சபைத் தேர்தல் இலங்கையைப் பொறுத்தவரையில் மிகத் தீர்க்கமானதாக காணப்படுகிறது.