இந்தியா - அமெரிக்கா உறவில் ஏற்பட்டுள்ள 'கசப்புணர்வு'

2019ஆம் ஆண்டு அமெரிக்காவின் டெக்ஸாஸ் நகரில் நடைபெற்ற நிகழ்ச்சியில் டொனால்ட் டிரம்ப்பை பற்றி பிரதமர் நரேந்திர மோடி 'அப்கி பார் டிரம்ப் சர்கார்' என்ற முழக்கத்தை முன்வைத்தார்.

- 

அடுத்த வருடம் டிரம்ப் இந்தியாவுக்கு வந்தபோது, அவரை வரவேற்க நமஸ்தே டிரம்ப் நிகழ்ச்சி ஆமதாபாத்தில் ஏற்பாடு செய்யப்பட்டது. ஆய்வாளர்கள் இது இரு தலைவர்கள் இடையே உறவு வலுவடைவதன் அடையாளமாக பார்த்தனர். 2024ஆம் ஆண்டில் மோடி மீண்டும் ஆட்சிக்கு வந்தார், டிரம்பும் மீண்டும் ஆட்சிக்கு வந்தார். ஊடகங்கள் இந்திய - அமெரிக்கா இடையிலான உறவை மீண்டும் இந்த இருத்தலைவர்கள் இடையிலான உறவின் கண்ணோட்டத்தில் பார்க்கத் தொடங்கின. ஆனால், இந்த இரு தலைவர்கள் இடையிலான உறவு கடந்த ஆறு மாதங்களில் முன்பு இருந்தது போல் இல்லை எனத் தோன்றுகிறது. ஜனாதிபதி ஆன பிறகு டிரம்ப் பல நாடுகள் மீது வரி விதிக்கப்படும் என அறிவித்தார். மற்ற நாடுகளின் பொருட்கள் அமெரிக்கா சந்தைக்கு மலிவான விலையில் வருவதாகவும், பிற நாடுகள் அமெரிக்க பொருட்கள் மீது அதிக வரி விதிப்பதாகவும் டிரம்ப் சொல்கிறார்.

ஆனால், வரிகளை அறிவித்த பின்னர் ஒரு வர்த்தக ஒப்பந்தத்தை செய்துகொள்ள இந்த நாடுகளுக்கு டிரம்ப் 90 நாள் அவகாசம் அளித்தார். ஆனால் ஜூலை 30ஆம் தேதி இந்தியா மீது 25 வீத வரியை டிரம்ப் அறிவித்தார். இதைத் தவிர, ரஷ்யாவிலிருந்து எண்ணெய் வாங்குவதற்காக அபராதம் விதிப்பது குறித்து டிரம்ப் பேசினார். இந்தியா மீதான வரியை அறிவித்த பின்னர், அமெரிக்கா பாகிஸ்தானுடன் ஒரு ஒப்பந்தத்தை செய்துகொண்டது. பாகிஸ்தானின் எண்ணெய் வளங்களை மேம்படுத்துவது குறித்து அந்த நாட்டுடன் அமெரிக்கா பேச்சுவார்த்தை நடத்தியுள்ளது. இரு நாடுகளுக்கிடையில் ஒரு வர்த்தக ஒப்பந்தமும் கையெழுத்தாகியுள்ளது.

இந்தியா அமெரிக்கா உறவுகளுடன், இந்தியாவின் வர்த்தக உறவுகள் குறித்தும் கேள்வி எழுப்பப்படுகின்றன. ரஷ்யாவுடனான இந்தியாவின் எரிசக்தி உறவுகள் எவ்வளவு முக்கியமானவை? இந்தியாவுக்கு வர்த்தக வரிகள் எவ்வளவு பாதகமானவை?

இந்தியா எந்தப் பாதையைத் தேர்ந்தெடுக்கலாம்? பிரதமர் நரேந்திர மோடியின் பிம்பத்தின் மீது இதன் விளைவு என்னவாக இருக்கும்? எண்ணெய் இருப்பு பற்றி பாகிஸ்தான் மற்றும் அமெரிக்கா இடையே ஏற்பட்டுள்ள ஒப்பந்தத்தால் இந்தியாவுக்கு என்ன பொருள்? இந்தியா மற்றும் அமெரிக்கா இடையேயான உறவின் போக்கை எப்படிப் பார்க்கவேண்டும்? பிபிசி இந்தியின் வாராந்திர நிகழ்ச்சியான, 'தி லென்ஸ்'ல் கலெக்டிவ் நியூஸ்ரூமின் செய்திப்பிரிவு இயக்குநர் முகேஷ் ஷர்மா இந்தக் கேள்விகள் குறித்துப் பேசினார்.