மாத்தளை அருள்மிகு முத்துமாரியம்மன்

மலையகத்தின் தலைவாசலாக விளங்கும் மாத்தளை மாநகரில் வீற்றிருந்து அருள் சுரக்கிறது ஸ்ரீ முத்துமாரியம்மன் திருக்கோவில். கொழும்பிலிருந்து 90 மைல் தொலை தூரத்திலும் கண்டியிலிருந்து 16 மைல் தொலை தூரத்திலும் அருவிகள் கொட்டும் அழகு மலைக் குன்றுகளுக்கு கிழக்கேயும், மகாவலி கங்கையின் தீர்த்தக் கரைக்கு மேற்கிலும் இத்திருத்தலம் அமைந்துள்ளது.

- 

அடர்ந்த காட்டுக்கு மத்தியில் பண்ணகாமம் என்று அழைக்கப்பட்ட இடத்தில் சிறிய மடம் ஒன்றிருந்தது. நெடுந்தூரம் கால்நடையாக வருபவர்களும், மாட்டு வண்டியில் பயணம் செய்பவர்களும் இம்மடத்தில் தங்கி, சமைத்து உணவருந்தி, மாடுகளுக்கு தண்ணீர் கொடுத்து, ஓய்வெடுத்து செல்வது வழக்கம். இங்கு ஓய்வெடுத்துக்கொண்டிருந்த சிகை அலங்காரம் செய்யும் ஒருவரின் கனவில் அன்னை பராசக்தியான முத்துமாரியம்மன் தோன்றி, தன் உருவத்தை வெளிப்படுத்தி, அருகிலுள்ள வில்வமரத்தடியில் தன்னை பூஜிக்குமாறு கேட்டுக்கொண்டதற்கிணங்க, அன்றிலிருந்து அம்மரத்தடியில் முத்துமாரியம்மன் சிலை வைத்து விளக்கேற்றி, அன்னையைத் தரிசித்தார்கள். மடத்தில் தங்கியிருந்த விஸ்வபிரம்ம குலத்தைச் சேர்ந்த ஆச்சாரி ஒருவர் நிரந்தரமாக மடத்தில் தங்கியிருந்து, வழிபாடுகளை நடத்தி வந்ததுடன், மடத்தில் தங்கிச் செல்லும் பயணிகளுக்கும் உதவிகள் செய்து வந்தார்.

சிவகங்கையைச் சேர்ந்த கருப்பண்ணன்சாமி என்பவர் அன்னையின் சிலைக்குமேல் கூரை அமைத்து சிறிய கொட்டிலாக ஆலயத்தை அமைத்தார். அம்மனிடம் முன் வைக்கும் வேண்டுதல்கள் பலிப்பதை உணர்ந்த பக்தர்கள் அம்மனுக்கு தாராளமாக காணிக்கைகள், நன்கொடைகள் வழங்கி ஆலயத்தை சிறிது சிறிதாகப் பெருப்பித்தார்கள். 1850 களில் சிறுகுடிலாக இருந்த ஆலயம் இன்று, 108 உயர இராஜ கோபுரத்தைக் கொண்டு, பஞ்ச தேர்கள் கொண்டு உலகப் பிரசித்திபெற்ற ஆலயமாகத் திகழ்கின்றது. 1958ஆம் ஆண்டில் மிகப் பழைமையான கட்டிடங்கள் அப்புறப்படுத்தப்பட்டு ஆலயம் விஸ்தரிக்கப்பட்டது. 1960ஆம் ஆண்டு மூலஸ்தான கோபுரம் அமைக்கப்பட்டு குடமுழுக்கு செய்யப்பட்டது. 1968ஆம் ஆண்டு கொடித்தம்பம் நிர்மாணிக்கப்பட்டது. 1971இல் நடராஜர் சபைக் கோவில் கட்டப்பட்டு கும்பாபிஷேகம் செய்யப்பட்டது. 1973இல் மேற்கு திசை பக்கமாக இருக்கும் இராஜகோபுரம் தமிழ்நாடு இராமநாதபுரத்தைச் சேர்ந்த நாகலிங்கம் ஸ்தபதியின் கைவண்ணத்தினால் நிர்மாணிக்கப்பட்டு கும்பாபிஷேகம் செய்யப்பட்டது. இதே ஆண்டு மேற்கு வாசல் மணிக்கோபுரம் கும்பாபிஷேகம் செய்யப்பட்டது. 1992ஆம் ஆண்டு வசந்த மண்டபம் திருத்தியமைக்கப்பட்டு புதிய விமானம் கட்டப்பட்டதுடன், தீர்த்தக் கேணியும் நிர்மாணிக்கப்பட்டது.