தங்கமா? வெள்ளியா? எதை வாங்குவது அதிக லாபம் தரும்

தங்கம் மற்றும் வெள்ளியின் விலை கடந்த சில வருடங்களாக தொடர்ந்து அதிகரித்து வருகிறது. வெளிச் சந்தையில், இந்தியாவில் ஒரு கிலோ வெள்ளியின் விலை மே 21 அன்று ரூ.1 லட்சத்தைக் கடந்தது. அப்போதிருந்து விலை ஒரு லட்சத்தை ஒட்டியே நிலவி வருகிறது.

- 

இந்திய பொன் மற்றும் நகைகள் உற்பத்தியாளர் கூட்டமைப்பின் இணையதளத்தின் படி ஜூன் 3ம் தேதி அன்று 999 தரச் சான்று பெற்ற ஒரு கிலோ வெள்ளியின் விலை ரூ.97,392 ஆக உள்ளது.

இத்துடன் 3% ஜிஎஸ்டி சேர்க்கப்பட்டால் ஒரு கிலோவின் விலை 1 லட்சத்தைக் கடந்துவிடும். இந்த ஆண்டு இரண்டாவது முறையாக வெள்ளி ஒரு லட்ச ரூபாயைக் கடந்தது.

மறுபுறம் தங்கத்தின் விலை தொடர்ந்து அதிகரித்து வருகிறது. 10 கிராம் தங்கத்தின் விலை 1 லட்ச ரூபாயை நெருங்கிவிட்டது.

இது, எதிர்காலத்தில் இந்த இரண்டு உலோகங்களில் எது அதிக விலை உயரும் என்கிற கேள்வி முதலீட்டாளர்கள் மத்தியில் எழுந்துள்ளது. இனி வரும் நாட்களில் தங்கத்தை விட வெள்ளி அதிக லாபம் கொடுக்க முடியுமா என்கிற கேள்வியும் உள்ளது.

தங்கம் மற்றும் வெள்ளி விலைகளின் ஒப்பீடு

வெள்ளி மிகவும் பயனுள்ள, தொழில் சார்ந்த உலோகம், ஆனால் தங்கத்தின் நிழலில் வெள்ளி இருட்டடிப்பு செய்யப்பட்டுவிடுகிறது.

வரலாற்று ரீதியாக 25 ஆண்டு தங்கம்-வெள்ளி விலை விகிதம் 68:1 என கருதப்படுகிறது. அதாவது தங்கத்தின் விலை வெள்ளியின் விலையைவிட தோராயமாக 68 மடங்கு அதிகரித்துள்ளது.

ஆனால் நிதிச் சேவைகள் நிறுவனமான மார்னிங் ஸ்டாரின் அறிக்கையின் படி தங்கம் மற்றும் வெள்ளி இடையே தற்போதைய விலை நிலவரம் 102:1 ஆக உள்ளது. தற்போது தங்கத்தின் விலை வெள்ளியின் விலையை விட 102 மடங்கு அதிகமாக உள்ளது.

ராய்டர்ஸ் செய்தி முகமையின் அறிக்கையின் படி, தங்கத்தின் விலை இந்த ஆண்டு 26% உயர்ந்து ஏப்ரலில் 3,500 டாலர் என்கிற வரலாற்று உச்சத்தை அடைந்தது.

தங்கத்தின் கொள்முதல், உலகளாவிய நிலையற்றதன்மை மற்றும் ஈடிஎஃப் (ETF) போன்றவற்றால் அதிகரித்து வருகிறது. மறுபுறம் வெள்ளியின் விலை 2025ல் 12% அதிகரித்துள்ளது.

ஆனால் நாம் கடந்த 12 மாத கால நிலவரத்தை எடுத்துக் கொண்டால் தங்கத்தின் விலை 40% அதிகரித்துள்ள நிலையில் வெள்ளியின் விலை 15% அதிகரித்துள்ளது.