இணையத்தில் திருடப்படும் தகவல்கள்

முன்னர் குறிப்பிட்டது போல ஓர் இலத்திரனியல் தொடர்பாடல் கருவிகள் உயிரற்ற, அசையா, சடப் பொருளாக இருந்தால் எம்மீது எந்தவிதமான பாதிப்பினையும் செலுத்தாமல் அமைதியாக இருக்க வேண்டும்.

- 

தொழில்நுட்பத்தின் சக்தி

ஆனால், கருவிகள் எம்மிடையே சமூக ஊடாட்டத்தை தூண்டி விட்டிருக்கின்றன. எமது உணர்வுகளை செயல்பட வைக்கின்றன. தம்மைப் பயன்படுத்த எம்மைத் தூண்டிக்கொண்டே இருக்கின்றன. அதற்குத் தனியான இலக்கு உண்டு. எமது உளவியலை எமக்கு எதிராகத் தூண்டிவிடுகிற வல்லமையும் அதற்கு உண்டு.

பிரபல சமூக ஊடகத்தளங்களான Facebook, Twitter, Instagram, Snapchat, Tiktok, Youtube யாவும் ஈர்த்திழுக்கும் தொழில்நுட்ப உத்தியால் உருவாக்கப்பட்டவை. அவற்றைப் பயன்படுத்தும் மக்களின் எண்ணங்கள், உளப்பாங்கு மற்றும் நடத்தைகள் என்பவற்றில் தாக்கத்தைச் செலுத்தும் இலக்கில் உருவாக்கப்பட்டவை. இவற்றை வடிவமைக்கும் போது தொழில்நுட்ப நிறுவனங்கள் மனித உணர்வு, ஊக்கம், இயலுமை, தூண்டுதல் என்பவற்றை நன்கு புரிந்து செயல்படுகின்றன. அவற்றைப் பயன்படுத்தும் போது, எமது கருத்துச் சுதந்திரத்தை பயன்படுத்தி, சமூகத்துக்குத் தேவையான கருத்தைச் சொல்கின்ற ஒரு பிரஜையின் உள்ளுணர்வை அவை எமக்கு வழங்குகின்றன. அத்தோடு, கோடிக்கணக்கான டொலர்களை செலவழித்து, வலைத்தளங்களின் ஒவ்வொரு சிறு கூறுகளையும் கல்வியறிவற்றவர்களும் இலகுவாகப் பயன்படுத்தும் விதத்தில் அவை உள்ளடக்கியுள்ளன. இதனால், மேற்குறித்த தளங்களை கற்றவர்களைப் போல கல்வி அறிவில் குறைந்தவர்களும் மிகத் துரிதமாகப் பயன்படுத்த முடியும். அதற்காக, கையேடுகளை பயன்படுத்த வேண்டிய தேவையும் இல்லை. ஓரிரு தடவைகள் பயன்படுத்தினாலே போதும், அவற்றைத் தொடர்ந்து பயன்படுத்தும் திறமை ஏற்பட்டு விடுகிறது. இதனையே, இலத்திரனியல் கருவிகளது ஈர்த்திழுக்கும் சக்தி என்கிறோம்.

சமூக வலைத்தளங்களின் ஈர்த்திழுக்கும் சக்தியுடன் கூடிய வடிவமைப்பு இன்று முக்கிய ஒரு பேசுபொருளாக மாறியுள்ளது. இவை மனித சமூகத்தின் உண்மையான சமூக ஊடாட்டத்தை வளப்படுத்தியிருக்கின்றனவா அல்லது குறைத்திருக்கின்றனவா என்ற பிரதான வினாவை அண்டியதாக விவாதங்கள் இடம்பெற்று வருகின்றன.