శివోహం..జనోహం!

మాఘమాసం అనేక పుణ్యకార్యాలకి, విశేష ఫలప్రదమైన పండుగలకి ప్రసిద్ధి చెందిందని పురాణాల వల్ల తెలుస్తోంది. ఈ మాఘ మాస మహాత్మ్యం మొదట శివుడు పార్వతికి, ఆ తర్వాత నారదుని ద్వారా సూతునికి, నూతని ద్వారా ముని గణానికి తెలిసింది.

- ఎస్.రహంతుల్లా, స్టాఫ్ రిపోర్టర్, శ్రీకాళహస్తి

మాఘమాసం విష్ణు ప్రీతికరమైనా పరమశివునికి అత్యంత ప్రతీకరమైన రోజు మహా శివరాత్రి ఈ మాసంలోనే వస్తుంది. “శివాయ విష్ణు రూపాయ, శివరూపాయ విష్ణవే" అన్నారు.అంటే ఇద్దరు అనుకునే శివకేశవులు ఒకటే అని అర్థం. ప్రతి మాసంలోనూ మాస శివరాత్రులు వస్తాయి. కానీ విష్ణు ప్రీతికర మాఘ మాసంలో వచ్చే మహా శివరాత్రి మహాత్మ్యం ఎంతో గొప్పది. మహా శివరాత్రి రోజున భక్తులు భోళాశంకరుని మీద భక్తితో తమ భక్తి విశ్వాసాలను ప్రకటించి ఉపవాసం, జపం, జాగరణలతో కాలం గడిపి తమకు సుఖ సౌఖ్యాలను ప్రసాదించాలని కోరుకుంటారు. శివుడు అభిషేక ప్రియుడు. నమక చమకాలతో శివుడిని అభిషేకిస్తే సంతోషించి, కోరిన కోరికలు నెరవేస్తాడని ప్రతీతి.

రాహు కేతు దివ్యక్షేత్రం-దక్షిణ కైలాసం

ముల్లోకాల్ని ఏలే దేవతల్లో శివయ్య భోళాశంకరుడు.సనాతుడు. భక్తజన వల్లభుడు, భూతనాథుడు, వైద్యనాథుడు, చరా చర జగత్తుకు ఆయనే విశ్వనాథుడు, చంద్రశేఖరుడు.భక్తితో కొలిచే తన భక్తులను సాక్షాత్కరించే శివయ్య దర్శనం సర్వపాప హరణం అంటారు. క్షీరసాగర మథనంలో అమృతం కంటే ముందు హాలాహలం పుట్టిన విషయం అందరికి తెలిసిందే. అది ముల్లోకాలను దహించి వేస్తుందన్న ప్రమాదం ఉండడంతో దేవదానవులందరు భీతావహులై తమను రక్షించాలంటూ పరమేశ్వరున్ని వేడుకోవడంతో లోకరక్షణార్ధం ఆ గరళాన్ని తానే మింగి, గొంతులో బంధించి గరళ కంఠుడుగా పేరు పొందాడు. ఈ హాలాహలం ప్రభావానికి ఆయన కంఠం నీలంగా మారడంతో నీలకంఠుడయ్యాడు. శివ నామస్మరణ చేస్తూ భక్తితో ముక్తి కోసం మోకరిల్లే రోజు మహా శివరాత్రి. సాగర మథనంతో ఆవిర్భవించి సమస్త జగత్తును నాశనం చేసే కాలకూట విషాన్ని గొంతును దాచి సృష్టిని రక్షించిన భక్తవత్సలుడు సర్వేశ్వ రుడు. ఆ సమయంలో సర్వేశ్వరునికి ప్రాణకోటి తనదైన రీతిలో నిరాజనాలు అందించింది. ఆ మహత్తర వేడుకే మహా శివరాత్రి. ఓం నమఃశ్శివాయ అంటూ శివపంచాక్షరి స్మరణతో మారుమోగే రాత్రి. భక్తితో బ్రహ్మమురారి సురార్చిత లింగం/ నిర్మల భాసిత శోభిత లింగం/జన్మజ దుఃఖ వినాశక లింగం తత్ప్రణమామి సదాశివ లింగం. బ్రహ్మమురారీ మున్నగు సురులు అర్చించిన నిర్గుణ, నిరాకార లింగమూర్తి శివుడు..