జనంలోకి తెలుగుమాట

తె లుగుదనం చిలికే మాటలు ఉన్నా, వాటికి బదులు ఆంగ్ల పదాలు అలవాటుగా వాడటం కారణంగా మనం తెలుగు భాషకు తీరని అన్యాయం చేస్తున్నాం.

- జయసూర్య

తె లుగుదనం చిలికే మాటలు ఉన్నా, వాటికి బదులు ఆంగ్ల పదాలు అలవాటుగా వాడటం కారణంగా మనం తెలుగు భాషకు తీరని అన్యాయం చేస్తున్నాం. నాగరికత, జీవన విధానాలు ఆధునికత, నవ్యత కారణంగా అన్నింటికీ తెలుగులో వాడుకకు వినియోగించుకొనే, సమానార్థకాలు లేని మాట నిజమే.

కొన్ని మాటలు మనం దత్తత తీసుకొన్నట్టుగా భాషలో కలుపుకోక తప్పదు. దైనందిన వ్యవహారాల్లో మాతృభాష ఎంతవరకు సామాన్యులు వినియోగించుకోగలుగుతున్నారో అనే విషయంపై భాష మనుగడ, ఆధారపడి వుంటుంది. తల్లి ఉగ్గుపాలతో ఆంగ్లం నేర్పిస్తే, తెలుగు మాటలు నేర్పడానికి బదులు ఆంగ్ల పదాలు ముద్దు ముద్దుగా వల్లె వేయిస్తే తెలుగు కనుమరుగవక తప్పదు. డాడీ, మమ్మీ సంస్కృతి శృతి మించితే తెలుగు పతనం కాక తప్పదు.తెలుగు కనుమరుగు కాకుండా రక్షించుకోవాలనే తపన కొద్ది మందికే ఉంది. చాలా మంది విద్యాధికులైన తల్లిదండ్రులకు అసలు ఆ పట్టింపు లేదు.

ఒకప్పటి పాలకులకు, భాషాభిమానం లేదనడం సరి కాదు. మన కవులకు మన భాషపై అభిమానం లేదనుకోవడం అంతటి దోషమే. అయితే వారు పట్టించుకోకపోవడం వలన మన భాష వ్యవహారంలోకి రాలేదనే మాట చారిత్రక వాస్తవం.