இலங்கையுடனான 2ஆவது டெஸ்டின் முதல் இனிங்ஸில் பங்களாதேஷ் 8 விக்கெட் இழப்புக்கு 220 ஓட்டங்கள்

அறிமுக வீரர் சொனால் தினூஷ சிறப்பான பந்துவீச்சு

- எஸ்.எஸ்.சி. அரங்கிலிருந்து நெவில் அன்தனி

இலங்கை - பங்களாதேஷ் அணிகளுக்கு இடையில் கொழும்பு எஸ்.எஸ்.சி. விளையாட்டரங்கில் நேற்று புதன்கிழமை (25) ஆரம்பமான இரண்டாவது டெஸ்ட் கிரிக்கெட் போட்டியில் முதலில் துடுப்பெடுத்தாடத் தீர்மானித்த பங்களாதேஷ் முதலாம் நாள் ஆட்ட நேர முடிவில் அதன் முதல் இன்னிங்ஸில் 8 விக்கெட்களை இழந்து 220 ஓட்டங்களைப் பெற்றிருந்தது.

தாய்ஜூல் இஸ்லாம் 9 ஓட்டங்களுடனும் ஈபாடொத் ஹுசெய்ன் 5 ஒட்டங்களுடனும் ஆட்டம் இழக்காதிருந்தனர்.

இலங்கையின் களத்தடுப்பு சிறப்பாக இருந்திருந்தால் பங்களாதேஷ் இந்த மொத்த எண்ணிக்கையைப் பெற்றிருக்கும் என்பது சந்தேகமே. களத்தடுப்பில் இலங்கை வீரர்கள் குறைந்தது 3 பிடிகளைத் தவறவிட்டனர்.

பங்களாதேஷ் அணி வலுவான நிலையை நோக்கி நகர்ந்து கொண்டிருந்த போது லிட்டன் தாஸ், முஷ்பிக்குர் ரஹிம் ஆகிய இரண்டு அனுபவம்வாய்ந்த வீரர்களின் விக்கெட்களை அறிமுக வீரர் சொனால் தினூஷ் கைப்பற்றி இலங்கைக்கு திருப்புமுனையை ஏற்படுத்திக் கொடுத்தார்.