மிரட்டல் சந்தேகம் எழுந்தால் புகாரளிப்பது கட்டாயம்

இணையப் பாதுகாப்புச் சட்டத் திருத்தத்தின்கீழ் முக்கிய உள்கட்டமைப்புகளுக்குப் புதிய விதிமுறை

- 

எரிசக்தி, தண்ணீர், போக்குவரத்து போன்ற முக்கியச் சேவைகளை வழங்கும் அமைப்புகள், மேம்பட்ட இணையத் தாக்குதல் குறித்த மிரட்டல்கள் தொடர்வதாகச் சந்தேகித்தால் அதுபற்றிப் புகாரளிப்பது இனி கட்டாயமாக்கப்படும்.

சிங்கப்பூரின் இணையப் பாதுகாப்பைக் கண்காணிக்கும் இணையப் பாதுகாப்பு அமைப்பிடம் இவ்வாறு புகாரளிப்பதைக் கட்டாயமாக்கும் நடைமுறை இந்த ஆண்டுப் (2025) பிற்பாதியில் நடப்புக்கு வரும் என்று எதிர்பார்க்கப்படுவதாகத் தகவல், மின்னிலக்க மேம்பாட்டு அமைச்சர் ஜோசஃபின் டியோ, நேற்று (ஜூலை 29) தெரிவித்தார்.

ஜூலை 18ஆம் தேதி, சிங்கப்பூரின் முக்கியமான தகவல் உள்கட்டமைப்பின்மீது வெளிநாட்டு அரசு ஆதரவு பெற்ற இணையப் பாதுகாப்பு உளவுக்குழுவான UNC3886 நடத்திவரும் தொடர்ச்சியான தாக்குதலை அதிகாரிகள் கையாண்டு வருவதாகத் தெரிவிக்கப்பட்டது.