சூடாமணியின் சேமிப்பு

“இதுதான் கடைசி, இந்தப் பழக்கத்தை விடுங்க,” முகத்திற்கு நேராக நீட்டியவள் கோபத்துடன் சென்றாள். “ம்ம்...ஒரு பிரிண்ட் எடுத்து வர இவ்வளவு ஆர்ப்பாட்டமா?” என்றபடி சான்றிதழைக் கோப்பைக்குள் சூடாமணி வைத்தார். அந்த நீல நிறக் கோப்புடன் அறைக்குள் நுழைந்தார். மகளின் நெருங்கிய தோழியின் தந்தை இறப்புக்குச் சென்றவளிடம், “மறக்காமல் அதை எடுத்து வா...” என்றார்.

- மலையரசி சீனிவாசன்

“அதெல்லாம் அந்தக் காலம் இப்போ எல்லாம் டிஜிட்டல் தான்!”

“இருக்கட்டுமே, அதில் ஒண்ணு.”

“அதெல்லாம் முடியாது!” என்றவள் வெளியே செல்வதைப் பெருமூச்சுவிட்டபடியே பார்த்துக் கொண்டிருந்தார்.

சூடாமணியின் நெருங்கிய தோழிகள் அன்னக்கொடியும் யாஸ்மீனும் விரும்பிச் செய்யும் செடி வளர்ப்பையும் தையல் வேலைகளையும் மாறி மாறிக் கூறி மகிழும்போது, “அவங்க செய்றது நேரத்தைப் போக்குவதற்கு. இது என் உயிரோடு கலந்தது.” என்பார். இறப்புச் சான்றிதழ்களுடன் செய்தித்தாள்களில் வரும் அதன் அறிவிப்புகளையும் நேர்த்தியாக வெட்டி வைத்திருந்தார். நீல நிறக் கோப்பின் முதல் பக்கத்தை வழியும் கண்ணீர் மங்கலாக்கியது. அடுத்த பக்கத்தைப் பழைய நினைவுகளோடு புரட்டினார் சூடாமணி.

நல்லதம்பி காவல் துறையில் பணிபுரிந்தவர். அறுபதுகளில் ஒருவரின் மரணத்தை உறுதி செய்ததும் சான்றிதழ்களைக் கைகளிலேயே எழுதி அதில் பதிவாளர் எனும் இடத்தில் கையெழுத்து இட்டுத் தருவார். அந்தச் சான்றிதழ்களைப் பெற்றுக் கொண்டதும், “அடப் பாவி இப்படிச் செய்துட்டியே...” என்று மார்பில் அடித்துக்கொண்டு அழும்போது தூக்கிவாரிப் போட்டது. “இறந்தவனை உனக்குத் தெரியுமா?” என்று அருகில் அமர்ந்திருக்கும் ரிஸ்வான் கேட்கும்போது “இல்லை” என்று மட்டும் தலையசைத்தார்.

“நீங்கதான் அதில் கையெழுத்துப் போடணுமா?” மனைவி கவலையுடன் கேட்கும்போது, “எப்பொழுதும் இல்லை. கையெழுத்துப் போடும் மேலதிகாரி விடுப்பில் இருக்கும்போது மட்டும்தான் பதிவாளர் எனும் இடத்தில் கையெழுத்துப் போட்டுத் தருவேன். ஒருவர் இறந்துவிட்டதை மருத்துவர்கள்தான் உறுதிசெய்து சான்றிதழ் தர வேண்டும்,” சூடாமணியின் முகம் கேள்விகளால் நிறைந்து வழிவதைக் கவனித்தவர், “அப்புறம், நான் ஏன் கையெழுத்துப் போடணும்? அதுதானே?” என்றார்.

“ஆமாங்க...”

“ஒருவர் இறந்ததும் அவங்க அடையாள அட்டையைக் காவல் நிலையத்திற்குக் கொண்டு வந்து ஒப்படைக்கணும். அதில் ஒரு சிறிய ஓட்டையைப் போட்டுக் கொடுப்போம். அதை வைத்துக்கொண்டுதான் மற்றக் காரியங்களுக்கு ஏற்பாடு செய்ய முடியும். அப்போதுதான் சிலர் மரண சான்றிதழ்களையும் எங்களிடம் தரச் சொல்வார்கள்,” எனும்போது நல்லதம்பியின் குரல் இளகியது.