கவிதை வளர்க்கும் தமிழ் முரசு

தமிழ் முரசு தங்களுக்கு அளித்த ஊக்குவிப்பே தங்களது இன்றைய நிலைக்குக் காரணம் என்கின்றனர் சிங்கப்பூரின் முன்னணிக் கவிஞர்கள்.

- விஷ்ருதா நந்தகுமார்

90 ஆண்டுகளுக்கு முன்பு மாத இதழாகத் தொடங்கி, இன்று நாளிதழாகச் சமூகத்தின் குரலாய் ஒலித்துக்கொண்டிருக்கிறது தமிழ் முரசு.

நடப்பு விவகாரங்களைப் பதிவிடும் செய்தித்தாளாக இருந்தாலும், அன்றுமுதல் இன்று வரை தமிழ்க் கவிதைகளுக்கு மிகுந்த முக்கியத்துவம் கொடுத்து அவற்றை வளர்ப்பதற்கான முயற்சிகளையும் எடுத்து வருகிறது தமிழ் முரசு.

1950களிலிருந்து கவிதைகளுக்கு என்று ஒரு தனிப் பக்கம் ஒதுக்கப்பட்டு, ஒவ்வொரு வாரமும் கவிஞர்கள் அனுப்பும் கவிதைகள் வெளியிடப்பட்டன.

வளரும் கவிஞர்களுக்குப் பேராதரவு

அனைத்து கவிஞர்களுக்கும் நாம் எழுதுவது கவிதையா என்ற தயக்கம் தொடக்கத்தில் இருக்கும் என்று பகிர்ந்துகொண் டார் 24 ஆண்டுகளாகத் தமிழ் முரசுக்கு கவிதை எழுதிவரும் திரு பனசை நடராஜன், 49.

“தொடக்கநிலையில் இருக்கும் வளரும் கவிஞர்களின் கவிதைகளை வெளியிடும்போது, அவர்களிடத்தில் மேலும் பல கவிதைகளையும் இலக்கியங்களையும் படித்து, தம்மை வளர்த்துக்கொள்ள வேண்டும் என்ற ஆசை பிறக்கிறது. அந்த ஆசையே ஒரு சிறந்த கவிஞனை உருவாக்குகிறது," என்று கவிஞர் களின் வளர்ச்சியில் தமிழ் முரசின் இன்றியமையாத பணியை நயம்பட விளக்கினார் திரு நடராஜன்.

தமிழ் முரசின் முன்னாள் ஆசிரியர் வை. திருநாவுக்கரசு தன் கவிதைகளைப் படித்துப் பாராட்டியது உண்டு என்று நினைவு கூர்ந்தார் கவிஞர் நெப்போலியன், 53.

“சமயம், அரசியல் சார்பற்ற சொற்களைப் பயன்படுத்த வேண்டும் என்பதை வலியுறுத்தி, நம்பகத்தன்மைக்குச் சிக்கல் வராமல் கவிதைகள் எழுத அறிவுரை சொல்லி அவர் வழிகாட்டினார்." என்று திரு நெப்போலியன் கூறினார்.

1994இல் புதுக் கவிதைகள் எழுதத் தொடங்கி, தமிழ் முரசுக்கு அனுப்பிவரும் திரு நெப்போலியன், பிறகு எழுத்தாளராகவும் திரைப்படப் பாடலாசிரியராகவும் உருவெடுத்தார்.

அடையாளத் தேடலில் பெரும்பங்கு

கவிஞர்கள் தங்கள் திறமைகளை வெளிப்படுத்த ஒரு தளமாக அமைவதோடு, அவர்களுக்கான அங்கீகாரத்தை தேடிக் கொடுத்தது தமிழ் முரசு.