காலந்தோறும் கலைஞர்களின் அரங்கம்

சிங்கப்பூரில் தமிழர்கள் கல்வியுடன் இலக்கியம், கலைகள், விளையாட்டு என எல்லாத் துறைகளிலும் மேம்பாடு காண தொடக்ககாலம் முதல் தமிழ் முரசு உந்துசக்தியாக இருந்து வருகிறது.

- வில்சன் சைலஸ்

தமிழ் முரசின் நிறுவனர் கோ. சாரங்கபாணி 1952ல் தொடங்கிய தமிழர் திருநாள் இந்நாட்டின் தமிழர்களின், குறிப்பாகப் பாட்டாளி வர்க்கத்தினரின் கலை ஆர்வத்துக்கும் முன்னேற்றத்துக்கும் முக்கியக் களமாகவும் வாய்ப்பாகவும் அமைந்தது.

மேடை நாடகங்களுக்கு ஆதரவு

“சிங்கப்பூரில் தமிழ் மேடை நாடகங்கள் அரங்கேறத் தேவையான அனைத்து ஒத்துழைப்பையும் அன்று தமிழ் முரசு தந்து ஆதரவளித்ததால்தான் அந்தக் கலை நிலைபெற்றது,” என்று குறிப்பிட்டார் இந்நாட்டின் முன்னோடி மேடை நாடகக் கலைஞர்களில் ஒருவரான 95 வயது திரு எஸ் சப்தகிரி சர்மா (எஸ்எஸ் சர்மா).

தொலைக்காட்சி போன்ற பொழுதுபோக்கு அம்சங்கள் பெரிய அளவில் இல்லாத காலகட்டத்தில் நாடகங்கள் அரங்கேறுவதற்குத் தேவையான அனைத்து ஒத்துழைப்பையும் தமிழ் முரசு முன்னின்று அளித்ததாக அவர் குறிப்பிட்டார்.

தமிழ் முரசு தந்த ஊக்குவிப்பால் பல நல்ல கலைஞர்கள் உருவானதோடு பின்னாள்களில் அவர்கள் வானொலி, தொலைக்காட்சியிலும் புகழ்பெற தமிழ் முரசின் ஊக்குவிப்பு பேருதவியாக இருந்ததாக நினைவுகூர்ந்தார் திரு சர்மா.

“பல கலை நிகழ்ச்சிகள்பற்றி தமிழ் முரசு நிறுவனரும் ஆசிரியருமான தமிழவேள் கோ சாரங்கபாணி தமிழ் முரசில் வெளியிட்டதுடன் நிகழ்ச்சிகளுக்குத் தலைமை வகித்தும் முன்னின்று நடத்தியும் உதவினார்,” என்றார் திரு சர்மா.

2000ஆம் ஆண்டின் இறுதிவரையில் தமிழ் முரசில் கலைத்துறை தொடர்பான செய்திகளுக்காக வாரந்தோறும் கலை முரசு என்ற தனிப் பக்கம் இடம்பெற்றது.

தற்போது தனியாகப் பக்கம் இல்லையென்றாலும் தமிழர்கள் பங்கேற்கும், படைக்கும் கலைச்செய்திகள், கலைஞர்கள் குறித்த செய்திகளைத் தொடர்ந்து வெளியிட்டு வருகிறது.

“என் முதல் நாடகம் மேடையேறியபோது தமிழ் முரசு கொடுத்த ஆதரவை மறக்க முடியாது,” என்றார் சிங்கப்பூரின் மேடை நாடக முன்னோடிகளில் ஒருவரான 91 வயது திரு ச. வரதன்.

1955ஆம் ஆண்டில் நியூ வேர்ல்ட் அரங்கில் பகுத்தறிவு நாடக மன்றம் மேடையேற்றிய 'நச்சுக் கோப்பை' நாடகம் தமிழ் முரசில் அப்போது விளம்பரப்படுத்தப்பட்டது. நாடகத்தைப் பார்க்க தமிழ் முரசு சார்பில் திரு வை திருநாவுக்கரசு வந்ததை திரு வரதன் பகிர்ந்துகொண்டார்.