'Rugby bou ons gemeenskappe'

Malmesbury het op Dinsdagaand 20 Januarie die afskop van die 2026SuperSpar- Mount Royal 7's beleef toe die Wesbank-rugbyklub die amptelike bekendstelling van die toernooi by die Dros-restaurant aangebied het.

- David Rossouw

Verteenwoordigers van die onderskeie spanne saam met Wesbank se toernooibestuur. Die Wesbank-toernooibestuur saam met die borge.

Die 19de weergawe van die gewilde 7's-kompetisie is net ná 19:00 bekendgestel en die boodskap was duidelik: Wesbank is nie net reg vir die uitdaging nie, maar bevestig hul status as die voorloper van 7's-rugby in die Boland.

Die atmosfeer was een van trots en optimisme, met gaste, ondersteuners en die media wat die klub se visie en toewyding eerstehands beleef het. Met die dinamiese betrokkenheid van Eduan Houberg en Ashley Lots, wat borgskappe en die organisasie dryf, sowel as volgehoue steun van die uitvoerende bestuur, is die verwagting dat die 2026toernooi een van die mees suksesvolle nog sal wees.