Padlopertjie kry dalk 'n tweede kans

Suid-Kaap Forum het met dr. Tina Kaldenberg van die Riversdal-dierekliniek gesels oor hoe die skilpad behandel gaan word en waarvoor die publiek en motoriste op die uitkyk moet wees: "Ons is bevoorreg om in die Hessequa-omgewing nog heelwat wilde diere rondom ons te hê. Michael Hansen van CapeNature besoek ons gereeld met beseerde voëls en diere. Een van dié pasiënte is die baie spesiale padloper-skilpadjie. Hy is raakgery en sy dop was erg gekraak. Gelukkig was daar geen skade aan die skelet wat deel van die dop vorm nie. Ek het die wonde skoongemaak en ontsmet. Hy het antibiotika en anti-inflammatoriese inspuitings gekry. Die dop is met verbande bymekaargehou en gereeld skoongemaak om seker te maak dat daar geen infeksie teenwoordig is nie. Die dop sal met spesiale epoksie geseël word. Dit is baie belangrik om bewus te wees daarvan dat baie van die reptiele nou uit hibernasie kom en meer aktief sal wees. Probeer versigtig en verantwoordelik bestuur. Help ons om ons erfenis van die diereryk en die natuur vir ons kinders te bewaar.

- Ben Snyman

Die padloper-skilpad word by Riversdal-dierekliniek behandel.

'n Baie hartseer verhaal het op 9 September afgespeel nadat 'n pragtige ratel ook raakgery is. Sy was in erge skok en ten spyte daarvan dat sy op 'n drup en skokmedikasie tydens die operasie was om haar gebreekte kakebeen te herstel, het sy dit nie oorleef nie. Ons wil almal ook waarsku dat ons binne drie dae vier slangbytgevalle gesien en behandel het. Wees versigtig, hou jou oë oop en kyk waar jy stap of ry," het Kaldenberg gesê.