Boere in rooivleisbedryf in dialoog met Minister van Landbou

Die leier van die Demokratiese Alliansie en Minister van Landbou, John Steenhuisen, het Vrydag, 27 Junie, tydens 'n virtuele dialoog met boere en verteenwoordigers van die Rooivleisprodusente-organisasie (RPO) by die Vryburg-vendusiekrale belangrike kwessies in die landbousektor aangespreek.

- 

Hoewel Minister Steenhuisen oorspronklik beplan het om die vergadering persoonlik by te woon, is sy vlug weens ongunstige weersomstandighede in die Wes-Kaap gekanselleer. Pieter Jonker, voorsitter van Agri Vryburg, het die sessie amptelik geopen voordat Steenhuisen die gesprek virtueel aangebied het.

Fokus op bek-en-klouseer en uitvoermarkte

Minister Steenhuisen het sy insette begin deur te verwys na die impak van bek-en-klouseer op die rooivleisbedryf. Hy het genoem dat Suid-Afrika steeds worstel met die nasleep van die 2019-uitbraak, terwyl die huidige uitbreking by Karan-voerkrale die prysstruktuur ernstig ontwrig. Hy het beklemtoon dat beheer oor bek-en-klouseer van kardinale belang is, veral met die oog op uitvoermarkte soos die Europese Unie.