મેટ્રો રેલની મુસીબતઃ થલતેજમાં વગર વરસાદે કાદવ-કીચડથી લોકો ત્રસ્ત

થલતેજ ચાર રસ્તાથી ગામ તરફ જવાના રસ્તા પર લોકો નરકાગાર સ્થિતિમાં મુકાયાઃ કાદવના કારણે બાળકો શાળાએ પણ જઈ શકતાં નથી, દુકાનોમાં પણ કાગડા ઊડે છે

- 

અમદાવાદ, શુક્રવાર

અમદાવાદીઓ પરિવહન માટે એએમટીએસ અને બીઆરટીએસનો ઉપયોગ કરે છે, પરંતુ લોકોમાં તો મેટ્રો રેલની લાંબા સમયથી ચર્ચા છે. આવતા મહિનાથી એટલે કે ઓગસ્ટથી અમદાવાદમાં મેટ્રો રેલ દોડતી થશે તેવો મેટ્રો રેલના સત્તાવાળાઓનો દાવો છે. મેટ્રો રેલના સત્તાધીશોની ભારે બેદરકારીથી તેનું નિર્માણકાર્ય ઘણા વખતથી મુસીબતરૂપ બન્યું છે. મેટ્રો રેલના થાંભલા (પિલર) નાખવાથી બિસમાર હાલતમાં મુકાઈ જતા રસ્તાથી હજારો વાહનચાલકો પરેશાન થતા આવ્યા છે. અનેક વાર પિલર બંધાઈ જાય તો પણ તેની આસપાસનાં બેરિકેડિંગને મેટ્રો રેલના સત્તાવાળા સમયસર હટાવતા નથી. પરિણામે આવાં બેરિકેડિંગ વાહનવ્યવહાર માટે અવરોધરૂપ બનીને જે તે વિસ્તારમાં દિવસો સુધી ટ્રાફિક જામની સમસ્યા સર્જે છે. દરમિયાન થલતેજમાં વગર વરસાદે મેટ્રો રેલની બલિહારીથી પાણી અને કાદવ-કીચડવાળા રસ્તાથી લોકો ત્રાહિમામ્ થઈ ગયા છે.