'n Hart vir kinders en goeie koffie

Onderwysers besef dikwels nie die impak wat hulle op 'n kind se lewe het nie - dalk nie terwyl die kind nog in hul klas sit nie, maar soms eers jare later.

- Maretha Swanepoel

Een so 'n onderwyser is Shane de Lange van Pietersburg Laerskool.

"Ek het 'n ongelooflike onderwyser op hoërskool gehad, Allan Henwood. Sy passie, geloof in kinders en menswees het my diep geraak. Vandag nog, elke oggend as ek my klas instap, weet ek: ek is op die regte pad," sê Shane.

Hy het in Januarie by die Pietiefamilie aangesluit, maar sy onderwysreis het reeds in 2019 begin as student by Laerskool Edleen. Dit was daar waar hy besef het dat 'n onderwyser se invloed veel verder strek as net die kurrikulum.

"Die belangrikste les wat leerders in laerskool moet leer, bo en behalwe akademie, is Christelike waardes. Ek glo vas dat kinders moet leer om met integriteit, respek en verantwoordelikheid te leef, veral wanneer niemand kyk nie."

Shane sê tegnologie speel 'n groot rol in kinders se leefwêreld en vra van hom as onderwyser om kreatief te wees.