'ஜனநாயகன்' சான்று விவகாரம்: உச்சநீதிமன்றத்தில் 15-ஆம் தேதி விசாரணை!

தணிக்கை வாரியமும் கேவியட் மனு தாக்கல்!!

- 

நடிகர் விஜய் நடிப்பில் உருவாகியுள்ள ஜனநாயகன் படத்திற்கு தணிக்கை சான்றிதழ் கிடைப்பதில் தொடர்ந்து சிக்கல் நீடிக்கிறது. உயர் நீதிமன்ற தனி நீதிபதி, படத்திற்கு தணிக்கை சான்று வழங்க உத்தரவிட்ட நிலையில், அவசரமாக தணிக்கை வாரியம் தலைமை நீதிபதி அமர்வில் முறையிட்டு இடைக்கால தடைப் பெற்றது. அடுத்த கட்ட விசாரணை ஜன 21ந்தேதிக்கு ஒத்தி வைக்கப்பட்ட நிலையில் ஜனநாயக பட தயாரிப்பு நிறுவனம் உச்ச நீதிமன்றத்தை நாடியது. இந்நிலையில் நேற்றைய தினம் ஜனநாயகன் பட வழக்கு பட்டியலிடப்பட்ட நிலையில், வரும் ஜன 15ந்தேதி பொங்கல் தினத்தன்று வழக்கு விசாரணை நடைபெறும் என்று தகவல் வெளியாகியுள்ளது. முன்னதாக தங்களிடம் முறையாக விளக்கம் கோராமல் வழக்கில் உத்தரவு பிறப்பிக்கக் கூடாது என தணிக்கை வாரியம் சார்பில் உச்ச நீதிமன்றத்தில் கேவியட் மனு தாக்கல் செய்யப்பட்டுள்ளது.

நடிகர் விஜய் தமிழக வெற்றிக் கழகத்தை தொடங்கி பல்வேறு அரசியல் பொதுக்கூட்டங்களை நடத்தியுள்ளார். திரைவாழ்க்கையில் தனது கடைசிபடம் என அறிவித்து ஜனநாயகன் படத்தில் நடித்துள்ளார். எச். வினோத் இயக்கத்தில் விஜய் நடித்துள்ள ஜனநாயகன் படம் ஜன 9ந்தேதி திரையரங்கில் வெளியாகும் என்று கூறப்பட்டிருந்தது.

2026 சட்டமன்ற தேர்தலை குறி வைத்து விஜய் களமிறங்கியிருக்கும் சூழலில், அவரது கடைசி படத்திற்கு பெரும் எதிர்பார்ப்பு உள்ளது.