சபரிமலையை உலுக்கும் முறைகேடுகள்: படி பூஜையில் பல கோடி ரூபாய் ஊழல்!

திடுக்கிட வைக்கும் பின்னணித் தகவல்கள்!!

- 

எண்ணற்ற முறைகேடுகள் சபரிமலை ஐயப்பன் கோவிலை உலுக்கி வருகின்றன. படி பூஜையில் பல கோடி ரூபாய் ஊழல் நடைபெற்றுள்ளது வெளிச்சத்திற்கு வந்துள்ளது. திடுக்கிட வைக்கும் பின்னணித் தகவல்கள் அதிர்வலைகளை ஏற்படுத்தி உள்ளன.

2019-ஆம் ஆண்டு சபரிமலை ஐயப்பனின் கோயில் கருவறை வாயிலில் உள்ள துவார பாலகர் சிலைகளின் கவசங்களை செப்பனிடும் பணியில் சுமார் 4 கிலோ தங்கம் களவு போனதாக குற்றச்சாட்டு எழுந்தது. தங்கக்கவசங்களை செப்பனிடும் செலவை கர்நாடக மாநிலம் பெங்களூரைச் சேர்ந்த உன்னிகிருஷ்ணன் போற்றி என்பவர் எடுத்துக் கொண்ட நிலையில், தங்கம் களவு போனதாக கூறப்பட்டது. பெரும் சர்ச்சையை கிளப்பியது.

சபரிமலை தங்கத் தகடு தில்லுமுல்லுகுறித்து சிறப்பு புலனாய்வு குழு விசாரிக்க கேரள உயர் நீதிமன்றம் உத்தரவிட்டது. இந்நிலையில், சென்னை அம்பத்தூரில் உள்ள ஸ்மார்ட் கிரியேஷன்ஸ் நிறுவனத்தில் துவாரபாலகர் சிலைகளின் கவசங்கள் செப்பனிடும் பணி மேற்கொள்ளப்பட்டது தொடர்பாக சிறப்பு புலனாய்வுக் குழு அதிகாரிகள் விசாரணை நடத்தினர்.

ஸ்மார்ட் கிரியேஷன்ஸ் நிறுவன தலைமை செயல் அதிகாரி பங்கஜ் பண்டாரி மற்றும் நிறுவன ஊழியர்களிடம் சிறப்பு புலனாய்வுக் குழு அதிகாரிகள் விசாரணை நடத்தினர்.

சபரிமலை கோயிலின் சிலைகள் மற்றும் புனிதமான கட்டமைப்புகளில் பதிக்கப்பட்டிருந்த தங்கம், கோயில் அதிகாரிகள், இடைத்தரகர்கள் மற்றும் தனியார் நகைக்கடைக்காரர்கள் சம்பந்தப்பட்ட ஒரு திட்டமிட்ட செயல்பாடு மூலம் களவாடப்பட்டு, திசைதிருப்பப்பட்டு, மாற்றப்பட்டதாக மாநில அரசால் நியமிக்கப்பட்ட சிறப்புப் புலனாய்வுக் குழு ஊழல் தடுப்பு நீதிமன்றத்தில் தெரிவித்துள்ளது.

கருவறையின் ஒரு பகுதியாக இருந்த தங்க முலாம் பூசப்பட்ட செப்புத் தகடுகள் 2019-ஆம் ஆண்டு பழுது பார்க்கும் சாக்கில் அகற்றப்பட்டு, சென்னையில் உள்ள ஒரு தனியார் பட்டறையில் ரசாயன முறையில் தங்கம் பிரிக்கப்பட்டு, இழப்பை மறைப்பதற்காகப் புதிய முலாம் பூசப்பட்டு மீண்டும் கொண்டுவரப்பட்டன.