மக்களால் தேர்வு செய்யப்பட்ட அரசால் நியமித்து கொள்ள முடியாத நியமன எம்.எல்.ஏ.க்கள் தேவையில்லை

எந்த ஒரு அரசாக இருந்தாலும் அது முழுக்க, முழுக்க மக்களால் தேர்வு செய்யப்பட்டதாகவே இருக்க வேண்டும். ஆளுநரோ, துணை நிலை ஆளுநரோ மக்களால் தேர்வு செய்யப்பட்ட அரசை ஆட்டுவிக்கும் நிலையில் இருக்க கூடாது. அந்தவகையில் புதுச்சேரியில் நியமன எம்.எல்.ஏ.க்களும் இருக்க கூடாது என்பதும் திமுகவின் கொள்கை.

- 

முன்பு மக்களால் தேர்வு செய்யப்பட்ட மாநில அரசே நியமன எம்.எல்.ஏ.க்களை நியமனம் செய்து வந்தது. மத்தியில் கடந்த 2014ல் பாஜக ஆட்சிக்கு வந்தது முதல் புதுச்சேரியில் நியமன எம்.எல்.ஏ.க்கள் அதிகாரத்தையும் பறித்து கொண்டது.

புதுச்சேரி யூனியன் பிரதேசமாக உருவாக்கப்பட்டபோது மக்களால் தேர்வு செய்யப்பட்ட ஆட்சியாளர்களுக்கு பொருளாதார ரீதியில், கல்வி ரீதியில், நிர்வாக ரீதியில் ஆலோசனைகளை கூற வல்லுனர்கள் வேண்டும் என்ற காரணத்திற்காக நியமன எம்.எல்.ஏ.க்கள் பதவி உருவாக்கப்பட்டது. தற்போது மக்கள் பிரதிநிதிகளே நல்ல ஆலோசனை தரக்கூடியவர்களாகத்தான் உள்ளனர். எனவே நியமன எம்.எல்.ஏ.க்கள் பதவியே தேவையில்லை, அதிலும் மக்களால் தேர்வு செய்யப்பட்ட புதுச்சேரி அரசால் நியமித்து கொள்ள முடியாத நிலையில் புதுச்சேரிக்கு நியமன எம்.எல்.ஏ.க்கள் தேவையில்லை என்பதே மக்களின் ஏகோபித்த கருத்தாக உள்ளது.

மேலும் நியமன எம்.எல்.ஏ.க்கள் நியமனத்தால் அரசுக்கு பொருளாதார இழப்பும், தொகுதிகளில் சட்டம் ஒழுங்கு பிரச்சனையும்தான் ஏற்பட்டு வருகிறது. அதாவது நியமன எம்.எல்.ஏ.க்களுக்கு சம்பளம், வாகன வசதி, உதவியாளர் உள்ளிட்டவைகள் வழங்கப்படுகிறது. இதனால் ஒவ்வொரு நியமன எம்.எல்.ஏ.விற்கும் பல லட்சம் அரசுக்கு வீண்செலவு ஏற்படுகிறது.