'Hoop in kleur' bring Sanca nader aan Rosemoor

Wat aanvanklik 'n toekenningsgeleentheid en fondsinsameling moes wees, het op Vrydagaand, 12 September, in Rosemoor 'n ander, maar ewe betekenisvolle draai gemaak. Sanca Tuinroete het 'n skolekunskompetisie en gala-aand beplan met die verwagting om sowat 80 gaste te ontvang, maar toe net 'n handjie vol deelnemers en hul families opdaag, het die organisasie vinnig plan B in werking gestel.

- Michelle Pienaar

In plaas daarvan om moed op te gee, is die Rosemoor-gemeenskap spontaan uitgenooi om die aand gratis saam te kom geniet. Die gehoor het kort daarna tot meer as 110 mense gegroei, en die saal is gevul met jonk en oud wat saam hoop, kleur en gemeenskapsgees kom vier het. Kletsrymer N1 Jozi het die gaste vermaak.

Hoop in kleur: staan op en verbind weer, is dus meer as net 'n slagspreuk.

"Ons het nie geld gemaak met die funksie nie, maar dit was op die ou end 'n groot sukses," vertel Denise de Beer, direkteur van Sanca Tuinroete.