'n Verhuurder se ergste nagmerrie realiseer

Die 73-jarige huiseienaar van 'n woning in Groeneweidepark kan dit nie bekostig om in haar eie huis te woon nie, want sy kan nie die munisipale rekening betaal en kos koop nie.

- Michelle Pienaar

"Daarom verhuur sy die huis en woon self in 'n kleiner plek," sê haar dogter.

"My ma het geen ander inkomste as die huurgeld wat sy kry met haar huis se verhuring nie.

"Dit dek haar huur vir 'n woonstel en lewenskostes."

Die probleem is egter dat die huurders sedert die begin van die jaar nie meer gereeld huur betaal nie.

"En sedert Junie betaal hulle absoluut niks. My ma stres haar dood."

Die dogter het George Herald met hulle penarie genader nadat sy twee soortgelyke artikels in Julie in die koerant gelees het, net van die ander kant van die draad (17 Julie, Gesin in sak en as na uitsetting en 24 Julie, Geen hofbevel, wel polisie).

In die artikels is die een huisgesin blykbaar onwettig uitgesit, en die ander gesin gedreig met uitsetting. Dit het glo sonder hofbevele gebeur.