'Ek het by sy graf gesit en grou'

Dit is in hierdie tyd, rondom sy verjaarsdag, wat Sheril Daniëls se hartseer op sy ergste is. "Sy verjaarsdag en Kersfees. Dit is vir my moeilike tye," sê Daniëls in gesprek oor die dinge wat haar lewe vir ewig verander het.

- Michelle Pienaar

Daniëls se seuntjie, Lendel, is op vierjarige ouderdom op 30 Julie 1992 oorlede. Hy sou vanjaar sy 37ste verjaarsdag vier, moontlik 'n vrou en kinders hê en wie weet watter beroep hy sou volg.

Intussen beweeg die lewe aan, en moes sy haarself regop hou, al was dit hoe moeilik. Daniëls se man, Julin, is verlede jaar op 13 Augustus oorlede.

Vir 38 jaar het Daniëls by Hoërskool George, as 'n Afrikaans-onderwyser skool gegee. Deesdae is sy een van die hoofde van sistemiese toetse, 'n posisie wat sy baie geniet.

Aldin Daniëls gee tans skool by Parkdene Sekondêr. Hy en sy gesin is sy ma se alles. Saam met hom is sy dogtertjies, Selah (links) en Salem.

"Ek was 'n kwaai onderwyser, ek het die beste uit my kinders gekry," vertel sy tydens 'n onderhoud aan George Herald.

"Ek sou 'n opstel drie keer oormerk om seker te maak die kind het die beste moontlike punt gekry."

In haar binneste moes Daniëls daagliks veg om emosionele oorlewing. Die gemis na haar seuntjie was baie erg. "Ek het by sy graf gesit en grou."