364 வாக்குறுதிகள் நிறைவேற்றம்

கடந்த சட்டப்பேரவைத் தேர்தலின் போது திமுக அளித்த 505 வாக்குறுதிகளில் 364 வாக்குறுதிகள் நிறைவேற்றப்பட்டு செயல்பாட்டில் உள்ளதாக முதல்வர் மு.க. ஸ்டாலின் தெரிவித்தார்.

- 

கிருஷ்ணகிரி, செப். 14:

கிருஷ்ணகிரியில் ஞாயிற்றுக்கிழமை நடைபெற்ற அரசு விழாவில் ரூ. 270.75 கோடி மதிப்பில் 193 நிறைவுற்ற பணிகளைத் திறந்துவைத்து, ரூ. 562.14 கோடி மதிப்பிலான 1,114 புதிய திட்டப்பணிகளுக்கு அடிக்கல் நாட்டி முதல்வர் ஸ்டாலின் பேசியதாவது:

தமிழகத்தில் உள்ள ஒவ்வொரு மாவட்டத்துக்கும் தேவையான திட்டங்களை நிறைவேற்றி வருகிறோம். ஒவ்வொரு தனிமனிதரின் கோரிக்கையையும் நிறைவேற்றி வருகிறோம். இதனால்தான் அரசுக்கு பொதுமக்களின் ஆதரவு பெருகிவருகிறது. எதிர்க்கட்சிகள் ஆக்கபூர்வமான எந்த விமர்சனத்தையும் வைக்கமுடியாமல், தேர்தல் வாக்குறுதிகள் எதையும் திமுக அரசு நிறைவேற்றவில்லை என்று சொல்லிவருகின்றன.

ஆட்சிப் பொறுப்புக்கு வந்தபிறகு, நாங்கள் அளித்த வாக்குறுதிகள் மட்டுமல்ல, தேர்தல் அறிக்கையில் சொல்லாத பல திட்டங்களையும் செயல்படுத்தி வருகிறோம். இந்த அரசு, நாட்டுக்கே முன்னோடி மாநிலமாகச் செயல்படுவது சிலருக்குத் தெரியவில்லை அல்லது தெரிந்தும் மறைக்க விரும்புகிறார்கள்.