திருச்செந்தூர் கோயிலில் இன்று குடமுழுக்கு

பல லட்சம் பக்தர்கள் குவிந்தனர்

- 

திருச்செந்தூர், ஜூலை 6: திருச்செந்தூர் அருள்மிகு சுப்பிரமணிய சுவாமி கோயில் குடமுழுக்கு திங்கள்கிழமை காலை (ஜூலை 7) நடைபெறுகிறது. இதையொட்டி, லட்சக்கணக்கான பக்தர்கள் குவிந்துள்ளனர்.

இக்கோயிலில் குடமுழுக்கை முன்னிட்டு, சுவாமி சண்முகருக்கு ராஜகோபுர வாசல் அருகில் 8 ஆயிரம் சதுரஅடி பரப்பளவில் பிரமாண்டமாக யாகசாலை அமைக்கப்பட்டு, 76 குண்டங்களில் 400 கும்பங்கள் வைக்கப்பட்டு, யாகசாலை பூஜைகள் கடந்த 1-ஆம் தேதி தொடங்கி நடைபெற்றன.

இந்நிலையில், சுவாமி சண்முகருக்கு ஞாயிற்றுக்கிழமை காலை 10-ஆம் கால யாகசாலை பூஜைகளும், மாலையில் 11-ஆம் கால யாகசாலை பூஜைகளும் நடைபெற்றன. இதில், பிம்ப சுத்தி, காப்பு கட்டுதல், திருக்குடத்தில் உள்ள அருட்பேராற்றலைத் திருமேனிக்கு உருவேற்றுதல், நிறைஅவி அளித்தல், திருவொளி வழிபாடு, திருநீறு திருவமுது வழங்குதல் உள்ளிட்டவை நடைபெற்றன.