மகாகவி பாரதியின் கனவுகளை பிரதமர் நனவாக்குகிறார்

குடியரசு துணைத் தலைவர் சி.பி.ராதாகிருஷ்ணன்

- 

மகாகவி பாரதியின் கனவுகளை தொலைநோக்குத் திட்டங்களால் பிரதமர் நரேந்திர மோடி நனவாக்குகிறார் என குடியரசு துணைத் தலைவர் சி.பி. ராதாகிருஷ்ணன் தெரிவித்தார்.

தமிழகம், காசி இடையேயான பிணைப்புகளைக் கொண்டாடும் வகையில், காசி தமிழ் சங்கமம் நிகழ்ச்சி கடந்த 2022-ஆம் ஆண்டுமுதல் நடைபெற்று வருகிறது. இதன்படி, கடந்த நவம்பர் மாதம் தொடங்கப்பட்ட 'காசி தமிழ் சங்கமம் 4.0' நிகழ்ச்சியின் நிறைவு விழா ராமேசுவரத்தில் செவ்வாய்க்கிழமை நடைபெற்றது.

இந்த விழாவில் குடியரசு துணைத் தலைவர் சி.பி. ராதாகிருஷ்ணன் மேலும் பேசியதாவது: தேசம் வாழ்க என்று சொல்வதால் நாம் தமிழர்களுக்கு எதிரானவர்கள் அல்லர். நமக்கு தேசம் ஒரு கண் எனில், தங்கத் தமிழ் மொழி மற்றொரு கண். காசியும், ராமேசுவரமும் புனிதத்தால் பிரிக்க முடியாத புண்ணிய நகரங்கள்.