90 பேருக்கு கலைமாமணி விருதுகள்: தமிழக அரசு அறிவிப்பு

மூன்று ஆண்டுகளுக்கான கலைமாமணி விருதுகளை தமிழக அரசு அறிவித்துள்ளது. கலைத் துறையில் சிறந்து விளங்குவோருக்கான விருதுகளின் வரிசையில், இசைத் துறையில் எம்.எஸ். சுப்புலட்சுமி பெயரிலான விருதுக்கு பின்னணி பாடகர் கே.ஜே. யேசுதாஸ் தேர்வு செய்யப்பட்டுள்ளார்.

- 

இதுகுறித்து தமிழக அரசின் சார்பில் புதன்கிழமை வெளியிடப்பட்ட அறிவிப்பு:

கடந்த 2021-ஆம் ஆண்டு முதல் 3 ஆண்டுகளுக்கான கலைமாமணி விருதுகள் அறிவிக்கப்பட்டுள்ளன. மேலும், பாரதியார், எம்.எஸ். சுப்புலட்சுமி, பாலசரஸ்வதி ஆகியோர் பெயரில் கலை வித்தகர்களுக்கான அகில இந்திய விருதுகளும் வழங்கப்பட உள்ளன. அதன்படி, பாரதியார் விருது எழுத்தாளர் ந.முருகேச பாண்டியனுக்கும், இசைத் துறையில் சிறந்து விளங்குவோருக்கான எம்.எஸ். சுப்புலட்சுமி விருது பின்னணி பாடகர் கே.ஜே. யேசுதாஸுக்கும், நாட்டியத்தில் புகழ் பெற்று விளங்குவோருக்கான பாலசரஸ்வதி விருது முத்துக்கண்ணம்மாளுக்கும் வழங்கப்பட உள்ளன. இந்த விருதுகள் தலா ரூ.1 லட்சம் காசோலையுடன், 3 பவுன் எடையுள்ள தங்கப் பதக்கம் கொண்டதாகும்.

இயல் பிரிவு: எழுத்தாளர்கள் க.திருநாவுக்கரசு, சாந்தகுமாரி சிவகடாட்சம், கவிஞர்கள் நெல்லை ஜெயந்தா, கே.ஜீவபாரதி, சமயச் சொற்பொழிவாளர்கள் எஸ்.சந்திரசேகர், சு.முத்துகணேசன், இலக்கியப் பேச்சாளர் தி.மு.அப்துல்காதர்.