அமெரிக்காவில் நீரவ் மோடியின் சகோதரர் கைது

ரூ.14,000 கோடி வங்கிக் கடன் முறைகேடு வழக்கு

- 

புது தில்லி, ஜூலை 5: பஞ்சாப் நேஷனல் வங்கியில் ரூ.14,000 கோடிக்கும் அதிகமாக கடன் மோசடி செய்த குற்றச்சாட்டில் இந்தியாவால் தேடப்படும் வைர வியாபாரி நீரவ் மோடியின் இளைய சகோதரர் நேஹல் மோடி (46) அமெரிக்காவில் கைது செய்யப்பட்டார்.

நேஹல் மோடிக்கு எதிராக இன்டர்போல் சிவப்பு நோட்டீஸ் விடுத்திருந்தது. அவரை கைது செய்து நாடுகடத்த வேண்டுமென அமலாக்கத் துறையும், சிபிஐயும் வலியுறுத்தியதால் அமெரிக்க அதிகாரிகள் இந்த நடவடிக்கையை மேற்கொண்டனர்.

நேஹல் மோடியை இந்தியாவுக்கு நாடு கடத்துவது தொடர்பான வழக்கின் அடுத்தகட்ட விசாரணை ஜூலை 17-ஆம் தேதி நடைபெறவுள்ள நிலையில், அவர் இடைக்கால ஜாமீன் கோரினாலும் அதற்கு எதிர்ப்பு தெரிவிக்கப்படும் எனவும் அமெரிக்க அதிகாரிகள் தெரிவித்தனர்.

பஞ்சாப் நேஷனல் வங்கியில் சுமார் ரூ.14,000 கோடிக்கும் அதிகமாக கடன் பெற்று திரும்பச் செலுத்தாமல் வைர வியாபாரி நீரவ் மோடியும், அவரின் உறவினர் மெஹுல் சோக்ஸியும் கடந்த 2018-ஆம் ஆண்டு இந்தியாவில் இருந்து தப்பினர். இதில் நீரவ் மோடி பிரிட்டனிலும், மெஹுல் சோக்ஸி ஆன்டிகுவாவிலும் தஞ்சமடைந்தனர்.